Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies destinó solo a participación xuvenil 24 ...
 

Aniciu

El Gobiernu d'Asturies destinó solo a participación xuvenil 24 millones dende’l 2012

El conseyeru Guillermo Martínez informa na Xunta del proyectu de Llei de Participación y Promoción Xuvenil

10/01/2019

   - La normativa va crear un cuerpu d'inspectores pa combatir les males práctiques nes actividaes d'ociu y prevé sanciones dende 100 a 60.000 euros

La Conseyería de Presidencia, al traviés del Institutu Asturianu de la Mocedá, destinó cuasi 24 millones a les polítiques de mocedá dende’l 2012 pa financiar, ente otres midíes, programes y intervenciones d’apoyu al movimientu asociativu y consolidar los instrumentos de participación d'esti sector de la población.

El conseyeru de Presidencia y Participación Ciudadana, Guillermo Martínez, dio a conocer güei estos datos mientres la so comparecencia en Xunta Xeneral pa informar sobre'l proyectu de Llei de Participación y Promoción Xuvenil, que va establecer un marcu normativu p'aplicar de manera tresversal la perspectiva nueva na acción de Gobiernu. Va garantizar, amás, la continuidá de los principales programes de sofitu qu'impulsa'l Principáu y va arrexuntar nun testu llegal únicu la distinta normativa dispersa en distintes regulaciones.

Martínez, que recordó que la presentación d'esti proyectu foi unu de los compromisos de llexislatura del Executivu, aseguró que con él se da continuidá a una trayectoria de compromisu cola población nueva por aciu la regulación de materies qu'anguaño escarecen de marcu normativu, y asina mesmo eleva a rangu de llei les polítiques que con calter estable incorporemos a la nuestra acción de Gobiernu como'l sofitu al movimientu asociativu y a les sos entidaes representatives”.

Les novedaes principales d'esti proyectu son la regulación de les actividaes de les escueles d'animación infantil y xuvenil, asina como aquelles que se realicen na cai, como campamentos urbanos y de branu, colonies y acampaes itinerantes. Amás, va crear un cuerpu d'inspección pa garantizar el cumplimientu de la llei y velar pol funcionamientu correctu del sector d'actividaes d'ociu y tiempu llibre, torgando l’intrusismu y les males práctiques.



Frutu del consensu

Pela primer vez, establezse un réxime sancionador pa esti tipu d'actividaes con sanciones que se mueven ente los 100 y los 60.000 euros y la posibilidá d’inhabilitación pa los infractores y la clausura de les instalaciones dende seis meses y un día hasta trés años.

El documentu, frutu del consensu y les aportaciones de los distintos axentes que formen parte del Conseyu Rector de Mocedá, reconoz el papel del Conseyu de la Mocedá y caltién la so condición d'organismu autónomu adscritu a la Conseyería de Presidencia y Participación Ciudadana, amás de respetar la so personalidá xurídica, la so capacidá de decisión y los sos órganos de gobiernu.

Tamién garantiza la continuidá de la Rede d'Oficines Xóvenes como ferramienta clave pa promover la participación nel territoriu, de la que reconoz la so condición de serviciu públicu y gratuitu d'información y asesoramientu.

Otru de los sos aspectos más relevantes ye qu'afita'l calter integral y tresversal de les polítiques de mocedá de manera que'l Gobiernu tien de contribuyir a ameyorar la so empleabilidá y accesu a la vivienda; a facilitar el so derechu a la información y a una educación pública que fomente valores cívicos y democráticos; a impulsar la igualdá y la solidaridá, y a facilitar la movilidá y un tresporte públicu algamadizu y de calidá.

El conseyeru destacó que, dende la llexislatura pasada, caltener el so compromisu cola mocedá foi una de les prioridaes del Gobiernu, que se manifestó, ente otres midíes, “na recuperación del Institutu Asturianu de la Mocedá, que'l so presupuesto pal 2019 ye de 3,1 millones; el fortalecimientu del so Conseyu Rector cola incorporación de los axentes sociales y económicos más representativos y la Federación Asturiana de Conceyos”. Tamién, nel caltenimientu financieru de los Conseyos de la Mocedá y la rede d'oficines xóvenes municipales con una aportación próxima a los 4,9 millones dende’l 2012, “lo que garantizó la so continuidá y servicios nel conxuntu del territoriu”, señaló Martínez.

 

Información sobre el documento

© Copyright 2006. Gobiernu del Principau d'Asturies