Gobiernu del Principau d'Asturies

Asturies, muncho más cerca

Tas en

Asturias.es La calidá del agua ye afayadiza pal bañu nel 97 % de les playes ...
 

Aniciu

La calidá del agua ye afayadiza pal bañu nel 97 % de les playes asturianes y escelente en trés de cada cuatro casos

La Conseyería de Sanidá va informar selmanalmente, a partir del día 15, sobre l’estáu de 62 zones pa bañistes de 19 conceyos

11/06/2018

La calidá del agua ye afayadiza pal bañu nel 97 % de les playes asturianes y escelente en trés de cada cuatro casos, según les calificaciones obteníes pola Axencia de Sanidá Ambiental y Consumu nel 2017. Esta calificación, que va tar vixente na temporada actual de baños, reflexa que l’agua resulta óptimo nun 75,7 % de los arenales, bono nel 15,7 % y abondo nun 5,7 %.

La calificación sanitaria anual del agua de bañu obtiénse, según establez la normativa, con una fórmula logarítmica, garrando en consideración los resultaos analíticos correspondientes a les postreres cuatro temporaes. Esti métodu de cálculu ye asemeyáu pa tolos países europeos, de forma que los datos puedan comparase ente ellos.

Los resultaos de los análisis tán disponibles na páxina web del Gobiernu d’Asturies, onde cualquier ciudadanu puede consultar la calidá del agua de la playa a la que va, amás de conseyos pa bañistes. L’enllaz ye esti:

https://www.asturias.es/Asturias/playas/index.htm.

Depués de conocer les calificaciones de la campaña del 2017, a partir d’esti día 15 la Conseyería de Sanidá va publicar selmanalmente los datos rellacionaos cola calidá sanitaria del agua de bañu, desque se realicen los análisis previstos nel programa de control oficial que se lleva a cabu cada añu. Estes pruebes busquen dos tipos de bacteries: los enterococos intestinales y la Escherichia coli y, a tenor de los resultaos, l’agua considérase apto o non aconseyao pal bañu.

Les actualizaciones selmanales correspuéndense col últimu análisis realizáu y reflexen la situación puntual de cada zona nel momentu del muestréu, lo qu’esplica que pueda haber variaciones en función de determinantes como, por exemplu, condiciones meteorolóxiques adverses o vertíos puntuales de poca duración.

 

72 puntos de muestréu

Nel censu d’esta temporada figuren 62 zones de bañu, con un total de 72 puntos de muestréu repartíos per 19 conceyos. Namás en dos de les árees analizaes detéctase una calidá insuficiente del agua, polo que nun s’aconseyen pal bañu.

La Conseyería de Sanidá recuerda qu’a les autoridaes locales correspuénde-yos estes funciones en cada temporada de bañu:

   - Caltener les condiciones afayadices de llimpieza, hixene y salubridá de les playes.

   - Informar con lletreros sobre les característiques de la playa y les midíes de seguranza.

   - Vixilar posibles puntos de vertíu averaos a les playes qu’impliquen riesgu de contaminación.

L’agua de bañu pue clasificase temporalmente como de calidá insuficiente y, sicasí, siguir siendo apta la calificación definitiva de la playa. Esto pue asoceder, por exemplu, cuando se producen situaciones de contaminación de poca duración, y nesi casu les autoridaes competentes han adoptar midíes pa investigar les causes y evitar situaciones asemeyaes, amás d’informar a la ciudadanía.

La normativa establez que se tien que dictar una prohibición permanente de bañu o aconseyar l’astención si en cinco años siguíos l’agua de bañu llogra una calificación insuficiente.

Amás, na contorna de les zones de bañu y en sitios de bon accesu, tien que se facilitar al públicu información oportuna sobre la calidá del agua, les midíes correctores y preventives y aquellos aspectos que puedan implicar un riesgu pa la salú de los usuarios.

 

 

Información sobre el documento

© Copyright 2006. Gobiernu del Principau d'Asturies