Gobiernu del Principau d'Asturies

Asturies, muncho más cerca

Tas en

Asturias.es Muyeres La Conseyería de Salú aconseya la vacunación contra’l gripe a ...
 

Muyeres

La Conseyería de Salú aconseya la vacunación contra’l gripe a les muyeres embaranzaes pa protexer a los sos neños

Anguaño van alministrase trés tipos de profilaxis, ente les que s’incluye pela primer vez la vacuna tetravalente de cultivu celular. La inmunización de mayores de 65 años y muyeres xestantes va adelantase al 21 d’ochobre, mentes qu’a los demás grupos de riesgu van alministra-yos la vacuna a partir del 4 de payares. El Principáu adquirió 244. 000 dosis pa esta campaña, qu’acaba’l 31 d’avientu, con una inversión de 1,2 millones

De izquierda a derecha, el coordinador de Enfermería del centro de salud de El Llano, Santiago González; el jefe del Servicio de Epidemiología de la Consejería de Salud, Ismael Huerta; el director general de Salud Pública, Rafael Cofiño; la directora de Atención Sanitaria y Evaluación del Servicio de Salud Sespa, Alejandra Fueyo; la gerente del área sanitaria V, Begoña Fernández, y la coordinadora del centro de salud de El Llano, Marta González.

14/10/2019

La Conseyería de Salú aconseya la vacunación contra’l gripe a les muyeres embaranzaes pa protexer a los neños, porque hasta pasaos los seis meses de vida nun puen recibir la profilaxis. El contaxu d’esta enfermedá aumenta’l riesgu de complicaciones nos naciellos y provoca ingresos y casos graves equiparables a los qu’afecten a les persones mayores de 65 años.

La campaña de vacunación antigripal 2019-2020 adelántrase al 21 d’ochobre pa mayores de 65 años y muyeres embaranzaes. A partir del 4 de payares, va inmunizase a los demás grupos de riesgu, ente los que pela primer vez s’incluyen naciellos prematuros mayores de 6 meses y menores de dos años.

El director xeneral de Salú Pública, Rafael Cofiño, presentó pela primer vez esta iniciativa nun centru de salú, concretamente nel d’El Llano, en Xixón, xunto a la directora d’Atención Sanitaria y Evaluación del Serviciu de Salú, Alejandra Fueyo; la coordinadora del centru, Marta González; el coordinador d’Enfermería y responsable de la vacunación del gripe nel equipamientu, Santiago González, y el xefe del Serviciu d’Epidemioloxía de la Conseyería de Salú, Ismael Huerta.

Cofiño destacó’l papel de la rede d’atención primaria na prevención y la promoción de la salú. Pela so parte, el xefe del Serviciu d’Epidemioloxía de la conseyería, Ismael Huerta, aportunó na importancia de que’l personal sanitario y sociosanitario se vacune pa prevenir contaxos a pacientes y grupos de riesgu.

La vacuna ta aconseyada pa mayores de 65 años, persones inmunodeprimíes o con enfermedaes cróniques, obesidá y muyeres embaranzaes, que presenten más riesgu de complicaciones. Aconséyase tamién pa quien conviven con persones de riesgu altu, personal de centros sanitarios y sociales, estudiantes en práctiques de Ciencies de la Salú, trabayadores de servicios públicos esenciales (policíes, bomberos, protección civil, etc).



Novedaes p’anguaño

Ente les novedaes d’esta campaña, que va rematar el 31 d’avientu, figura l’alministración de trés tipos de vacuna, ente les que s’incluye pela primer vez la tetravalente de cultivu celular, indicada pa xestantes y persones con alerxes graves al güevu y a los antibióticos.

A los mayores de 65 años van inocula-yos la trivalente reforzada, que llogra una meyor respuesta inmune nesti sector de la población, y a los demás grupos de riesgu, dende los seis meses hasta los 64 años, va alministrase la tetravalente clásica, que protexe de los dos tipos de virus A y les dos variantes del B.

Salú adquirió 244.000 dosis de vacuna, que supunxeron una inversión de 1.194.710 euros. Del total, 170.000 son de trivalente reforzada, 72.000 de la tetravalente clásica y 2.000 de tetravalente de cultivu celular.



Distribución de dosis

Esta selmana van repartise les dosis nos puntos de vacunación y va difundise la campaña con cartelos y folletos. Amás, pela primer vez va ellaborase un documentu de preguntes frecuentes sobre’l gripe que va tar disponible na páxina d’Astursalú (www.astursalud.es ) p’ayudar a estremar los síntomes d’un gripe de los d’un resfriáu. Otra manera, Salú va difundir al traviés de les redes sociales un videu sobre la importancia de la inmunización y les consecuencies del gripe na población de riesgu.



Balance de la campaña pasada

La cobertura vacunal aumentó na campaña pasada ente los grupos de riesgu, con 211.742 dosis alministraes de les 228.295 distribuyíes. En total, el Serviciu d’Epidemioloxía rexistró 3.816 contaxos de gripe por cien mil habitantes, frente a los 4.390 del exerciciu anterior.

Por grupos de riesgu, el 57 % de les persones de más de 65 años recibieron la vacuna, de manera que se superó’l 55,2 % de la campaña previa. Nesti grupu, rexistráronse 1.061 casos de gripe por cien mil habitantes, menos de la metá que na temporada anterior, cuando se rexistraron 2.597. Sicasí, aconséyase que se vacune polo menos el 65 % d’esti colectivu p’amenorgar la morbilidá y la mortalidá.

Al respective de les xestantes, l’añu pasáu inmunizáronse’l 44 %, frente al 32 % de la temporada anterior. Tamién aumentó la cobertura ente’l personal sanitario: del 32 % al 50 %.

Información sobre el documento

© Copyright 2006. Gobiernu del Principau d'Asturies