Gobiernu del Principau d'Asturies

Asturies, muncho más cerca

Tas en

Asturias.es Mayores El serviciu telefónicu p’atender na crisis a persones mayores ...
 

Mayores

El serviciu telefónicu p’atender na crisis a persones mayores con enfermedaes cróniques que viven soles recibe 1.686 llamaes en menos d'un mes

La mayoría de las consultes fueron plantegaes por muyeres de más de 65 años. Cruz Bermeya realizó 460 intervenciones pa dispensar a la población alimentos, medicación y material d’ hixene

20/04/2020

El serviciu telefónicu habilitáu pola Conseyería de Derechos Sociales y Bienestar, cola collaboración de Cruz Bermeya, p’atender a persones mayores que viven soles y con enfermedaes cróniques na crisis sanitaria del coronavirus recibió 1.686 llamaes dende la so puesta en serviciu, el pasáu 23 de marzu, y hasta el pasáu vienres.

La mayoría de les llamaes fueron realizaes por muyeres que viven soles y tienen más de 65 años. Cruz Bermeya, amás d'encargase de l'atención telefónica, llevó a cabu 460 intervenciones pa espachar alimentos, medicación y productos d'hixene a les persones que la riquieron por aciu el nuevu serviciu telefónicu.

Los conceyos onde más ayudes s'apurrieron son Xixón, con 207, Uviéu, con 68, y Avilés, con 57.

Un equipu de 108 profesionales y voluntarios respondió a les llamaes y entamó les entregues. Quepe destacar que, ente toles persones atendíes, 47 atopábense en confinamientu domiciliariu como midida preventiva y 18 dieren positivu nel test de la COVID-19.

Nes postreres dos selmanes rexistróse un aumentu importante de consultes sobre les ayudes económiques a les que puede optase na crisis sanitaria. Nestos casos, derivóse a los solicitantes a los servicios municipales correspondientes, yá que dende esti teléfonu da cobertoria específica a los colectivos indicaos enantes.

La Conseyería de Derechos Sociales y Bienestar propunxo la puesta en marcha d'esti serviciu dientro del Grupu d'Acción Social del Comité d'Emerxencies d'Asturies, que ta coordináu pola Delegación del Gobiernu n'Asturies y nel que participen l'Executivu autonómicu, al traviés de Protección Civil y el 112 Asturies, la Federación Asturiana de Conceyos y Cruz Berrmeya Asturies.

El serviciu sigue n'activo y tien habilitaes trés llinies de teléfonu a les que s'apuerta marcando'l númberu 900 100 285. L'horariu d'atención al públicu ye, de llunes a vienres, de nueve de la mañana a nueve de la nueche.

Información sobre el documento

© Copyright 2006. Gobiernu del Principau d'Asturies