Gobierno del Principado de Asturias

Asturias, mucho más cerca

Estás en

Aniciu Gobiernu Actualidá El Gobiernu d’Asturies y la Fundación ONCE editen en braille 400 ...
 

Actualidá

El Gobiernu d’Asturies y la Fundación ONCE editen en braille 400 guíes y publicaciones sobre violencia de xéneru

La iniciativa avera los recursos públicos frente al maltratu y la violencia sexual a muyeres con discapacidá visual o ceguera

Un momento del acto

31/01/2019

El Gobiernu d’Asturies y el grupu empresarial Ilunión, de la Fundación ONCE, editaron nel sistema de llectoescritura braille alredor de 400 guíes y publicaciones sobre violencia de xéneru. Con esta iniciativa, que figura ente les actuaciones impulsaes pol Principáu nel marcu del Pactu d’Estáu contra la Violencia de Xéneru, va ponese a disposición de persones con discapacidá visual o ceguera información sobre los recursos públicos y protocolos d’atención a les víctimes de violencia machista.

En concreto, editáronse en braille cuatro publicaciones: una guía con información sobre los derechos de les muyeres víctimes de violencia de xéneru, un documentu rellacionáu colos recursos públicos d’atención y protección y un manual sobre les situaciones d’acosu y abusu en redes sociales, amás d’una edición especial del Pactu Social contra la Violencia sobre les Muyeres y del códigu éticu asumíu pol Gobiernu d’Asturies. De caún de los documentos llanzáronse cien exemplares.

El Principáu financió los costos d’impresión y l’adaptación de tolos testos al braille, a lo que se destinaron 2.719 euros procedentes de les partíes asignaes a la comunidá pol Pactu d’Estáu contra la Violencia de Xéneru.

Con esta acción, el Gobiernu d’Asturies y la Fundación ONCE promueven l’accesibilidá de los conteníos a toles persones con discapacidá visual o ceguera. Los exemplares editaos van tar disponibles nel Institutu Asturianu de la Muyer, na Fundación ONCE, nos centros asesores de la muyer, los centros de servicios sociales municipales y na rede de cases d’acoyida.

Esta ye la primer iniciativa promovida pol Principáu y Ilunión-Fundación ONCE dientro d’un programa más ampliu de collaboración p’ameyorar los recursos asistenciales a víctimes de violencia de xéneru con dalgún tipu de discapacidá. Pa eoo, pol Gobiernu d’Asturies propúnxose la creación d’un grupu de trabayu que va esplorar les acciones qu’hai que desenvolver.

Amás, dende l’Institutu Asturianu de la Muyer y Polítiques de Mocedá tán estudiándose otres actuaciones cola Fundación ONCE. Ente elles, la organización d’una xornada, onde tamién va participar l’asociación Plena Inclusión, pa la presentación d’una guía d’agresiones sexuales a tol personal técnico de les entidaes que trabayen con persones con discapacidá.

 

Información sobre el documento

© Copyright 2006. Gobierno del Principado de Asturias