Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes Desenvolvimientu Rural fortalez los servicios esenciales que ...
 

Agricultura y montes

Desenvolvimientu Rural fortalez los servicios esenciales que garanticen l’actividá del sector primariu y la cadena alimentaria

Les midíes técniques implementaes fixeron posible habilitar el teletrabayu pa 106 funcionarios. Los ganaderos puen tramitar documentación y xestionar certificaos y comunicaciones sobre los sos animales al traviés de la canal Remo web

21/03/2020

La Conseyería de Desenvolvimientu Rural, Agroganadería y Pesca caltién operativu un organigrama básicu, presencial y de teletrabayu cola mira de garantizar l’actividá del sector primariu y el sostenimientu de la cadena alimentaria, esenciales pal suministru a la ciudadanía.

Les midíes técniques implementaes dexaron habilitar teletrabayu pa 106 funcionarios. Amás, pa dar cumplimientu a la resolución de 16 de marzu d’esti departamentu, estableciéronse prestaciones esenciales qu’impliquen a trés empleaos públicos por cada serviciu, ratio que tamién s’afitó pa les oficines comarcales. En dambos casos, los turnos van ser rotatorios.

L’atención al públicu nos servicios centrales de la conseyería realízase telefónicamente y d’urxencia. Nes oficines comarcales tamién se caltién l’atención telefónica y la selmana que vien va habilitase la xestión de cita previa pa l’asistencia presencial vinculada a llabores esenciales pal sostenimientu de la cadena alimentaria, como recoyida de crotales y/o documentación, que va empezar a dase’l 30 de marzu.

Otra manera, al traviés de la canal Remo web, los ganaderos puen realizar munchos trámites per vía telemática, como la notificación d’altes por nacencia y compra, comunicaciones de baxa, solicitú y confirmación de guía d’orixe y sanidá pecuaria, de certificáu de calificación sanitaria y d’informes de pruebes sanitaries, ente otros.

La declaración del estáu d’alarma supunxo la suspensión de la campaña oficial ordinaria de saniamientu, que se va reprogramar la selmana que vien pa retomala lo más llueu, anque se caltienen les pruebes de saniamientu pa comercialización y tresporte, la toma de muestres en mataderos y el muestréu na planta d’eliminación de cadabres (Proygrasa), amás del serviciu veterinariu d’urxencia nes oficines comarcales.

Pela so parte, la Guardería del Mediu Natural caltien actividá y serviciu de vixilancia y prevención, trabayando diariamente colos guardes mayores y un guarda por zona. Tol so personal atópase a disposición y en retén vinculáo al nivel de necesidá, con dellos niveles de disponibilidá.

Amás, cola mira de caltener la campaña de trampéu primaveral de l’aviespa asiática, alcordóse un protocolu d’actuación ente la conseyería y la Federación Asturiana de Conceyos (FACC) pol que les entidaes locales tramiten una habilitación pa caltener la rede.



Temporada de pesca fluvial y caceríes colectives

La temporada de pesca fluvial y les caceríes colectives por daños de la fauna montés suspendiéronse. Sicasí, habilitóse un procedimientu d’autorización de aguardos individuales de control de xabalín nel cotu de Navia, focu principal d’estroces sobre cultivos d’Asturies.

Los sobrantes de pesca fluvial nun s’axudiquen y van retomase desque se vuelva abrir la temporada. Amás, los sorteos vinculaos a les reserves rexonales de caza queden aplazaos.

Pela so parte, la Dirección Xeneral de Pesca Marítima caltién los servicios de vixilancia y sofitu a les campañes de la flota asturiana, xestionando los cambeos de modalidá, autorizaciones o cualquier otru trámite riquíu dende les cofraderíes nesti marcu.

Los plazos pa la tramitación de tolos procedimientos quedaron suspendíos pola declaración del estáu d’alarma y el so cómputu va volver entamar cuando pierda vixencia’l real decretu o, nel so casu, les prórrogues d’esti. Amás, los periodos de prescripción y caducidá de cualquier acción o derechu van quedar interrumpíos de la que dure esi periodu.

Desenvolvimientu Rural realiza un siguimientu de contino del sector primariu y agroalimentariu p’analizar l’impactu de la crisis y estudiar midíes compensatories.

Información sobre el documento

© Copyright 2006. Gobiernu del Principau d'Asturies