Gobiernu del Principau d'Asturies

Asturies, muncho más cerca

Tas en

Asturias.es L’andanciu de gripe algama una intensidá alta na tercer selmana ...
 

Aniciu

L’andanciu de gripe algama una intensidá alta na tercer selmana del mes, con 623 casos por cien mil habitantes

23/01/2020

L’andanciu del gripe siguió aumentando na tercer selmana del añu hasta algamar una tasa de 623 casos por cien mil habitantes, lo que supón un nivel d’intensidá altu. La medría de los contaxos produzse sobre manera nos menores de 5 años y na mocedá, y caltiénse ente’l restu de la población. La presión asistencial n’Atención Primaria y Urxencies caltiénse estable y tiende a baxar nesta selmana.

El virus gripal predominante sigue siendo l’A (nH1N1), según los datos facilitaos pola Rede de Médicos Centinela d’Asturies, anque tamién circulen de manera relevante del virus respiratoriu sincitial.

Al respective de los ingresos, l’HUCA, como hospital centinela de la comunidá, rexistró hasta esta tercer selmana del añu 161 ingresos por gripe, de los que 55 foron graves. La estimación pal conxuntu d’Asturies xubió a 495 hospitalizaciones. Los más de los ingresos y casos graves presentaben dalgún factor de riesgu, y yeren mayores de 50 años.

Los datos nacionales reflexen que’l gripe espardióse per tol país, sacante en Cantabria y Andalucía, onde’l nivel d’espardimientu ye local. Asturies, Navarra y La Rioxa son les úniques comunidaes onde la intensidá de la epidemia ye alta.



Vacunaciones y conseyos

Na tercer selmana de xineru vacunáronse otres 1.375 persones, de les que 675 son mayores de 65 años y 47, muyeres embaranzaes. Nesta temporada, protexéronse del gripe 206.287 asturianos, 5.855 persones más que na mesma selmana de la campaña del 2018.

Los centros de salú van siguir alministrando la profilaxis a les persones de riesgu que lo soliciten esti mes.

La llavadura frecuente de manes con agua y xabón ye una de les midíes más eficaces pa evitar los contaxos de gripe. Les autoridaes sanitaries aconseyen amás tener una bona ventilación de los espacios zarraos.

En casu de tusir y/o espirriar tienen que s’usar pañuelos de papel d’un usu namás pa tapar la boca y la ñariz, o bien el buecu del coldu pa evitar contaminar les manes.

Amás, suxérse llimpiar con frecuencia les superficies que se toquen coles manes como los pomos de les puertes, interruptores, etc.

Los síntomes del gripe son malestar xeneral, una fiebre alta súbita y tos, que se trata con antitérmicos. Los antibióticos nun curen el gripe.

   Icono gráfico alusivo al tipo de archivo Audiu (Audiu: 550 Kb) (n'español)

Información sobre el documento

© Copyright 2006. Gobiernu del Principau d'Asturies