Gobiernu del Principau d'Asturies

Asturies, muncho más cerca

Tas en

Asturias.es Temes Pesca La flota asturiana va disponer d’un 71% más de cuota de xarda ...
 

Pesca

La flota asturiana va disponer d’un 71% más de cuota de xarda que l’añu pasáu, hasta superar les dos mil tonelaes

La medra na capacidá de pesca d'esta especie ye ún de los mayores rexistraos dende 2014. El ministeriu treslladó una propuesta de resolución a les comunidaes del Cantábricu Noroeste pa que presenten allegamientos hasta'l día 7

01/04/2020

La nueva repartida de les cuotes adicionales provenientes de los intercambios ente especies con otros países de la Unión Europea (swaps) va incrementar la capacidá pesquera de la xarda un 71% respectu al total asignáu en 2019. D'esta miente, la flota asturiana va disponer de 2.083.339 quilos, una de les mayores cantidaes dende 2014.

La Secretaría Xeneral de Pesca del Ministeriu d'Agricultura, Pesca y Alimentación treslladó a les comunidaes del Cantábricu Noroeste un borrador de la propuesta de resolución que va tar abiertu a allegamientos hasta'l 7 d'abril. El documentu recueye les reparties de los swaps tomando en consideración el criterio de calter socioeconómicu y de dependencia de la flota, tal que reivindicaba'l Principáu.

El Gobiernu d'España llogró de los intercambios ente especies con otros países europeos 1.700.000 quilos. El 60% d'esa cantidá ye'l que se va partir teniendo en cuenta criterios como'l númberu de buques, mesmo que la so eslora y capacidá de propulsión, lo qu'atiende a les continues demandes del sector pesqueru asturianu.

La flota rexonal tenía primeramente asignaos pa la campaña d'anguaño 1.796.190 quilos de xarda, a los que se van añedir 287.149 más, n’oficializándose la repartida de los swaps. Esta cantidá supón una importante medra, yá que colos criterios de repartida d'años anteriores la flota asturiana solo llograra 92.000 quilos de los 1.700.000 xeneraos polos intercambios con otros países. En concreto, l'añu pasáu, dispunxo d'últimes de 1.217.785 quilos.

El Gobiernu d'España implantó en 2014 un sistema de regulación de la pesca de la xarda basáu fundamentalmente en criterios históricos pa la repartida ente provincies. De magar, el Principáu y el so sector pesqueru reclamaron una revisión d'esi modelu de xestión. Nesti contestu, l'Alministración rexonal y representantes del sector axustaron en febreru en Madrid, nel senu del grupu de trabayu de la especie, la necesidá de llograr mayores posibilidaes de pesca pa la flota asturiana.


Icono gráfico alusivo al tipo de archivo Audiu (Audiu: 466 Kb) (n'español)

Información sobre el documento

© Copyright 2006. Gobiernu del Principau d'Asturies