Gobiernu del Principau d'Asturies

Asturies, muncho más cerca

Tas en

Asturias.es Educación organiza per segundu añu el Scratch Day, un eventu de ...
 

Aniciu

Educación organiza per segundu añu el Scratch Day, un eventu de programación creativa p'alumnáu de Primaria

La iniciativa, na que participan nueve centros, va tener llugar el sábadu nel Palaciu de Congresos Ciudad de Oviedo

17/05/2018

La Conseyería d'Educación y Cultura, en collaboración cola Rede de Formación del Profesoráu d'Asturies y l'asociación Aulablog, va entamar el sábadu, per segundu añu consecutivu, el Scratch Day, un eventu que se celebra a escala mundial pa favorecer que l'alumnáu de Primaria aprienda a codificar y programar por aciu una ferramienta qu'enseña a pensar de forma creativa, a razonar sistemáticamente y a trabayar de forma colaborativa.

La finalidá de la xornada, que va tener llugar nel Palaciu de Congresos y Esposición Ciudá d'Uviéu dende les 9:00 hasta les 14:30 hores, ye la promoción del aprendizaxe y l'acercamientu de la programación creativa a les aules de 4º, 5º y 6º de Primaria.

Nel Scratch Day Asturies participen directamente nueve centros asturianos -unu más que l'añu pasáu- con cuenta de qu’alumnáu, profesoráu y families s’axúnten p’amosar y compartir los sos proyectos, participen en talleres y apriendan unos d'otros.

Na organización tamién collaboren el Conceyu d'Uviéu, Uviéu Entama, el IES Jerónimo González (Sama de Llangréu), el grupu Mandilones de colores y distintes empreses rellacionaes cola formación en disciplines como la programación, la robótica y les competencies STEAM (Science, Technology, Engineering, Arts and Maths).

Los centros participantes son los siguientes:

Del ámbitu del Centru de Profesoráu y de Recursos (CPR) d'Uviéu:
  - CP San Pedro de los Arcos (Uviéu)
  - CP San Llázaro-Escueles Blanques (Uviéu)
  - Colexu Peñamayor (Siero)
  - ColexuSan Ignacio (Uviéu)

Del ámbitu del CPR de Xixón-Oriente:
  - CP Lloréu (Xixón)
  - CP Maliayo (Villaviciosa)
  - CP Severo Ochoa (Xixón)
  - CP San Félix (Candás) 

Del ámbitu del CPR Cuenques Mineres:
  - CP Jesús Neira (La Pola L.lena)

Na web del eventu puede ampliase información sobre'l programa, la presentación d'esperiencies, la feria de trabayos, los talleres y los organismos collaboradores. N’acabando la xornada, van colgar na páxina los materiales ellaboraos y un resume gráficu.

Tamién puede siguise la xornada en Twitter (@scratchdayastur) al traviés de la etiqueta #ScratchDayAsturias.

Información sobre el documento

© Copyright 2006. Gobiernu del Principau d'Asturies