Gobiernu del Principau d'Asturies

Asturies, muncho más cerca

Tas en

Asturias.es L'Hospital de Cabueñes encara'l mayor tresformamientu de los sos ...
 

Aniciu

L'Hospital de Cabueñes encara'l mayor tresformamientu de los sos 50 años d'hestoria con una ampliación que va asitialu a la vanguardia de la sanidá pública española

La primer fase del proyectu, que supón una inversión de 38 millones, va empezar l’añu viniente y les instalaciones nueves van entrar en funcionamientu nel 2021. El conseyeru Francisco del Busto destaca'l gran retu qu'implica simultanear les obres cola asistencia a los pacientes

Vista aérea de las instalaciones

10/11/2017

El conseyeru de Sanidá, Francisco del Busto, presentó güei’l plan director del proyectu d'ampliación y reforma del Hospital de Cabueñes, una obra que va suponer el mayor tresformamientu del centru sanitariu nos sos 50 años d'hestoria pa convertilu nun equipamientu a la vanguardia de la sanidá pública española.

El diseñu funcional del plan, qu'antepón el bienestar del paciente y asítialu nel centru de l'atención sanitaria, busca tamién favorecer l'accesibilidá, la conexón cola docencia y la formación siguida, l'usu intensivu de les tecnoloxíes nueves y un sistema organizativu que facilite les relaciones y circulaciones ente servicios.

L’hospital nuevu va ser un centru punteru, empobináu al llogru d'oxetivos fundamentales pa los años próximos, como l’ambulatorización de procesos, la resolución alta, la confortabilidá de los usuarios, la seguridá, la calidá, la meyora continua y la sostenibilidá económica y medioambiental.

Na presentación a los profesionales del hospital participaron miembros del estudiu d’arquitectura López Fando y Asociados, que resultó axudicatariu del contratu de redacción del plan director y el proyectu d'execución, lo mesmo que de la dirección facultativa de les obres de la primer fase d'ampliación y reforma, por un importe de 694.000 euros.

Esta iniciativa, que cunta con subvención del Fondu Européu de Desenvolvimientu Rexonal (Feder), va desenvolvese en dos fases que van dexar pasar de los actuales 60.000 metros cuadraos del centru sanitariu a más de 114.000, de los que 96.000 van ser d'usu hospitalariu.

Na primer fase va construyise un edificiu nuevu anexu al inmueble actual na zona este, amás d'otru de calter industrial que va allugar les instalaciones de climatización y calderes. Van executase tamién les galeríes que van conectar les dependencies nueves coles antigües, mesmo que la urbanización de la redolada.

Prevése que'l proyectu d'execución de la primer fase salga a llicitación nel primer trimestre del 2018 y que les obres empiecen primero de rematar l'exerciciu, de cuenta que les instalaciones nueves podríen entrar en serviciu nel 2021. La inversión ronda los 38 millones d'euros.

La segunda fase va encarar la reforma integral del edificiu d'hospitalización. Asina, va construyise un inmueble onde agora s'alluguen les consultes esternes, que va ser un allongamientu del planiáu na primer fase, y va completase la urbanización de la zona. Primero de la construcción d'esti bloque nuevu va ser necesario baltar el qu'anguaño acueye les consultes, que ye la parte más antigua de tol complexu. La execución d'estos trabayos supón un gran retu, yá que va haber que simultanear les obres cola actividá del centru asistencial.

 

L’edificiu nuevu, clave de la reforma

L'edificiu d'ampliación que se va llevantar na primer fase ye la clave de la reforma. La propuesta recoyida nel plan director camuda de manera importante les dimensiones previstes nel proyectu que se presentó en mayu al Conceyu de Xixón, yá que se pasa d'un edificiu de 15.000 metros cuadraos a otru de más de 49.000, de los que 37.500 van destinase a usu asistencial.

Esti aumentu del espaciu respuende a criterios técnicos y funcionales y implica actuaciones nueves, amás del adelantu d'otres previstes primeramente pa la segunda fase. D'esta miente, va encarase la construcción de les zones d'esterilización, farmacia y llaboratorios, lo que va dexar dar continuidá a estos servicios y que la so actividá nun tenga qu'atayase.

L’edificiu nuevu va tener seis altures, anque va cuntar con ocho plantes en total, seis d'elles asistenciales y dos técniques: climatización, redes de comunicación y otros suministros. La organización de los servicios va suponer un saltu cualitativu n'accesibilidá y confortabilidá pa usuarios y profesionales, y va dexar redimensionar les distintes árees.

La distribución por plantes va ser esta:

 

 - Suétanu -1. Va acoyer los servicios d'esterilización, farmacia y vestuarios.

 - Planta baxa. Va allugar el serviciu d'urxencies, que va esperimentar un gran tresformamientu, yá que va cuntar con un circuitu específicu, estremáu del restu de les circulaciones del hospital, y va tener trés entraes: una pa pediatría, otra p'adultos y una más pa les ambulancies y emerxencies. Nesti pisu va asitiase tamién l’área de diagnósticu per imaxe, que va dar serviciu tanto al área d'urxencies como a la de consultes.

 - Segunda planta. Va acoyer l'atención ambulatoria y la diálisis. Consultes esternes va disponer d'una zona d'espera amplia con grades cristaleres que va favorecer la entrada de lluz y la confortabilidá.

 - Tercer planta. Va incluyir el bloque quirúrxicu, la unidá de cuidaos críticos postoperatorios y la de recuperación postanestésica (URPA). Amplíase'l númberu de quirófanos hasta un total de 20, cuatro más que na actualidá, de la que se dobla'l númberu d’URPAS. El bloque complétase con 10 boxes de la unidá de cuidaos críticos postquirúrxicos, de los que 2 van ser d'aislamientu.

 - Quinta planta. Va acoyer l'hospital de día oncohematolóxico, que va cuntar con 34 puestos y 4 boxes independientes; van allugase tamién les consultes d'atención y zones d'espera específiques, un espaciu singular que'l so diseñu primó la privacidá.

 - Sesta planta. Nesti pisu van tar la unidá de cuidaos intensivos y intermedios en continuidá, que va tener más puestos, va cuntar con lluz directa del esterior y el so diseñu va ser más funcional, adaptáu pa caltener la intimidá. Van construyise 18 puestos en box individual y 4 d’asilaos

Francisco del Busto destacó que'l proyectu reflexa'l compromisu del Gobiernu d'Asturies cola sanidá pública y supón un esfuerciu económicu importante. Tamién estimó al personal sanitario les sos aportaciones.

 

 

Información sobre el documento

© Copyright 2006. Gobiernu del Principau d'Asturies