Gobiernu del Principau d'Asturies

Asturies, muncho más cerca

Tas en

Asturias.es La calidá del agua d’ocho de cada diez playes asturianes recibe ...
 

Aniciu

La calidá del agua d’ocho de cada diez playes asturianes recibe la calificación sanitaria máxima

El 98,6 % de les zones de bañu tien una calidá afayadiza y el 93 % considérase bona o escelente

17/05/2017

L’agua d’ocho de cada diez playes asturianes ye escelente pal bañu, la calificación sanitaria máxima que se concede na Unión Europea a partir de los análisis selmanales que se realicen de xunu a setiembre nes trés últimes temporaes, nesti casu, nel periodu 2014-2016.

Según los resultaos sacaos l’añu pasáu pola Axencia de Sanidá Ambiental y que tán vixentes nesta temporada, el 98,6 % de les zones de bañu de la comunidá presenta una calidá afayadiza del agua. D’elles, el 80 % ye escelente, mentes que les restantes estrémense a partes iguales ente bones y abondes. Según estos datos, namás hai un únicu puntu de la costa onde la calidá considérase escasa, polo que nun s’aconseya’l bañu nesa zona.

El Llaboratoriu de Salú Pública de la Conseyería de Sanidá analiza y publica selmanalmente los datos rellacionaos col estáu de les playes sobre la base del programa de vixilancia que se lleva a cabu anualmente na temporada de baños y que se publica nel enllaz https://www.asturias.es/Asturias/playas/index.htm. La socesión de midíes determina la calificación final que s’otorga a cada zona.

El llaboratoriu dispón de l’acreitación máxima pa realizar los análisis y ye de los pocos que foi quién a certificar tol procesu, dende la recoyida del agua pal muestréu hasta’l so estudiu posterior.

Les calificaciones calcúlense d’alcuerdu cola normativa comunitaria, lo que fai posible que toles playes europees s’evalúen de la mesma forma y los sos datos seyan comparables. N’España, amás, los datos incorpórense al Sistema d’Información Nacional d’Agua de Bañu (Náyade), que depende del Ministeriu de Sanidá, Servicios Sociales y Igualdá y que pue consultase nesti enllaz:

http://nayade.msssi.es/Splayas/ciudadano/ciudadanoZonaAction.do

 

61 zones de bañu y 71 puntos de muestréu

Nel censu oficial d’esta temporada figuren 61 zones de bañu, con 71 puntos de muestréu repartíos en 19 conceyos.

Al respective de los resultaos del añu pasáu, trés playes ameyoren la calificación: Frexulfe, en Navia; La Ribera, en Cuideiru, y La Palmera, en Carreño, que pasen de calidá bona a escelente. Otres siete pasen d’escelente a bona: Arnao, en Castrillón; San Llorienzo, al altor de la escalera 12, en Xixón, y San Antolín y El Sablón, en Llanes. Pela so parte, L’Arena, en Valdés; Po, en Llanes, y La Franca, en Ribadeva camuden d’una situación bona a aceptable.

Énte’l principiu de la temporada de baños, Sanidá recuerda que son les autoridaes locales les que tienen la competencia nestos trabayos:

   - Caltener les condiciones de llimpieza, hixene y salubridá de les playes.

   - Informar con lletreros de les característiques de la playa y les midíes de seguranza.

   - Vixilar los posibles puntos de vertíos averaos que puedan suponer riesgu de contaminación.

D’alcuerdu cola normativa vixente, si a lo llargo de cinco años siguíos l’agua recibe la calificación d’insuficiente pue dictase una prohibición permanente de bañu o’l conseyu d’abstenese del mesmu. Amás, na contorna d’estes árees y en sitios de bon accesu tien que se facilitar al públicu información sobre la so calidá, les midíes correctores y preventives, y aquellos aspectos que puedan suponer un riesgu pa la salú de los bañistes.

Na temporada de baños, los datos que se publiquen cada selmana correspuenden al últimu análisis realizáu y reflexen namás la situación puntual nel momentu del muestréu. Esto esplica que puedan producise variaciones según determinantes como, por exemplu, unes condiciones meteorolóxiques adverses o vertíos puntuales.

Información sobre el documento

© Copyright 2006. Gobiernu del Principau d'Asturies