Gobiernu del Principau d'Asturies

Asturies, muncho más cerca

Tas en

Asturias.es Muyeres El Gobiernu d'Asturies pon en marcha una campaña d'información ...
 

Muyeres

El Gobiernu d'Asturies pon en marcha una campaña d'información pa combatir la violencia de xéneru nel confinamientu

El Principáu recuerda que tolos recursos de sofitu tán disponibles y pide a la ciudadanía que s'implique énte'l maltratu a les muyeres nesta crisis sanitaria. Seis families ingresaron na Rede de Cases d'Acoyida dende la declaración del estáu d'alarma, más del doble de lo avezao. Les víctimes tienen a la so disposición un serviciu de whatsapp al traviés de los teléfonos 682 916 136 y 682 508 507

27/03/2020

El Gobiernu d'Asturies punxo en marcha una campaña pa informar sobre los recursos disponibles destinaos a les muyeres víctimes de violencia de xéneru y concenciar sobre la importancia de collaborar frente'l maltratu nel periodu de confinamientu motiváu pola crisis sanitaria del COVID-19.

El Principáu constató que dende la declaración del estáu d'alarma ingresaron na Rede de Cases d'Acoyida, seis families, más del doble de lo avezao.

La campaña, que se va espublizar al traviés de les redes sociales y por aciu anuncios publicitarios, recuerda que tolos servicios p'ayudar a les víctimes siguen funcionando y que los centros d'emerxencia y acoyida fueron declaraos servicios esenciales.

Tamién detalla los recursos disponibles pa denunciar casos de violencia de xéneru: los teléfonos 112, 091 y 062 p'alertes; l'aplicación Alertcops, qu'unvia una señal d'avisu a la Policía cola localización; el 016 y los centros d'atención municipal de los conceyos, el corréu del ministeriu 016_online@mscbs.es y un serviciu de whatsapp al traviés de los móviles 682 916 136 y 682 508 507

Amás de los recursos existentes, llegóse a un alcuerdu col Colexu de Farmacéuticos pa que en cada farmacia apaeza nun llugar visible'l mensaxe “Si sufres violencia de xéneru o conoces a daquién, podemos ayudate” acompañáu d'una peana con tolos teléfonos d'emerxencia y de los Centros Asesores de la Muyer. Les y los profesionales van facilitar que les muyeres que lo precisen puedan llamar dende ellí mesmo, ufiertándo-yos teléfonu y un llugar nel que se respete la so intimidá.

La Dirección Xeneral d'Igualdá recuerda que'l maltratu contra les muyeres constitúi un delitu públicu y que combatilo ye un deber de la ciudadanía. Tamién estima l'esfuerzu y dedicación del personal de la Rede de Cases d'Acoyida, y de les trabayadores de los Centros Asesores de la Muyer y del Institutu Asturianu de la Muyer nestos momentos, especialmente complicaos pa les víctimes y los sos fíos y fíes.



Los recursos disponibles son los siguientes:

  • Los 16 Centros Asesores de la Muyer (CAM) partíos pol Principáu atienden elemáticamente toles urxencies que se presenten. Si nun ye posible caltener una conversación telefónica, hai tamién correos electrónicos pa comunicase colos centros y teléfonos móviles a los que puede unviase un whatsapp, anque nun correspuendan a la zona na que se mora. Lo importante ye alertr énte cualesquier situación de riesgu.
  • La Rede de Cases d'Acoyida funciona les 24 hores con servicios mínimos del personal d'atención directa. La coordinación de la rede tamién ta disponible tol día, mesmo qu’el teléfonu d'ingresos por derivación urxente de profesionales. Amás, ta preparáu un informe de continxencia pr si fora mester ampliar les places.
  • Los equipos d'atención psicosocial a la muyer de los servicios de salú mental de les ocho árees sanitaries atienden casos d'urxencia, bien telemáticamente o con asistencia directa en situación de crisis.
  • Los colexos de l'abogacía d'Uviéu y Xixón caltienen el serviciu de guardia pa la vez d'oficiu específicu pa violencia de xéneru.
  • Les unidaes de valoración forense integral d'Uviéu y Xixón cunten con un psicólogu y un trabayador social en situación de disponibilidá. Nel casu de les oficines d'asistencia a víctimes (Uviéu, Xixón y Avilés), hai una persona del cuerpu de xestión como servicios mínimos por caúna.
  • L'aplicación Alertcops, importante nuna situación de peligru, en casu de que nun seya posible realizar una llamada. Dende esta app únviase una señal d'alerta a la policía con xeolocalización. Tien un avisu específicu pa violencia de xéneru y otru pa violencia sexual.


Icono gráfico alusivo al tipo de archivo Cartelería (Zip: 3 Mb)

Información sobre el documento

© Copyright 2006. Gobiernu del Principau d'Asturies