Gobiernu del Principau d'Asturies

Asturies, muncho más cerca

Tas en

Asturias.es El Principáu va invertir 877.000 euros p’ameyorar la seguranza y ...
 

Aniciu

El Principáu va invertir 877.000 euros p’ameyorar la seguranza y la calidá ambiental nel túnel d’ensayos con fueu de Siero

El conseyeru d’Empléu presentó güei na Casa Conceyu’l proyectu destináu a esta instalación de la Fundación Barredo, allugada en San Pedro. Los trabayos incluyen la implantación de sistemes de depuración d’emisiones difuses y d’efluentes d’estinción de quemes

De izquierda a derecha: El jefe del Servicio de Minería del Principado, Santiago Berjano; la directora general de de Minería y Energía, Belarmina Díaz; el consejero de Empleo, Industria y Turismo, Isaac Pola; y la concejala de Urbanismo del Ayuntamiento de Siero, Noelia Macía

11/02/2019

El conseyeru d’Empléu, Industria y Turismu, Isaac Pola, anunció güei que’l Principáu va invertir 877.000 euros p’aumentar la seguranza y impulsar la meyora ambiental na redolada del túnel de San Pedro (Siero), instalación de referencia de la Fundación Barredo que fai posible ensayar a escala real los efectos del fueu nel interior de túneles.

“Nel túnel va instalase un sistema de seguranza que va costar alredor de 193.000 euros y va desenvolvese un plan ambiciosu de meyora ambiental, dotáu con 684.000, que va consistir nel diseñu y implantación d’un métodu nuevu de depuración d’emisiones difuses y d’efluentes d’estinción de fueos con recicláu d’agua industrial”, precisó Pola.

Estes iniciatives van suponer una meyora notable de les instalaciones y, al empar, van favorecer la puesta en marcha de llinies d’investigación nueves dientro de la fundación. “D’esta manera, van complementase les actuaciones tan novedoses que se tán executando dende va un añu”, amestó’l titular d’Industria.

La Fundación Barredo desenvuelve anguaño trabayos d’investigación en software pa les patentes de cables, en sistemes de realidá aumentada aplicaos a la restauración d’espacios afectaos pola actividá minera y na catalogación y xestión d’información xeorreferenciada. La institución tamién amplió los sos estudios sobre’l fueu en xeneral y les quemes en túneles en particular. Toes estes actividaes realícense cola soscripción de convenios con TST-APPPus (Tunnel Safety Testing SA), la Universidá d’Uviéu, el Centru Tecnolóxicu de la Información y la Comunicación (CTIC), Know-How Innovative Solutions y la Fundación Asturiana de la Enerxía (Faen).

Isaac Pola informó güei nel Conceyu de Siero sobre’l proyectu previstu pal túnel, nuna xunta onde participaron tamién la conceyala d’Urbanismu, Noelia Macías; la directora xeneral de Minería y Enerxía, Belarmina Díaz, y Santiago Berjano, del Serviciu de Minería del Principáu.



El trabayu de la fundación

Dende los sos principios nel 2001, la Fundación Barredo trabayó nuna llinia d’investigación en cables que dio pie a dos patentes (CableScann y OpenScann), nuna llinia de simuladores pa formación y en distintos estudios sobre l’espaciu soterrañu: ventilación, tresmisión y barreres de contención d’emisiones de gas y ventilación y quemes en túneles.

Los equipamientos principales de la entidá son el túnel d’ensayos con fueu y el Centru d’Esperimentación y Ensayos de San Pedro, unes infraestructures úniques n’Europa y namás comparables al proyectu Tunnel Fire, allugáu en Massachusetts (Estaos Uníos). Nesta redolada, la fundación realiza pruebes de ventiladores (de rindimientu, resistencia a la temperatura, funcionamientu en carga) y, sobre manera, simulaciones de fueu real en túnel, de gran importancia pa garantizar la seguranza de los espacios soterraños, de los medios de tresporte y de les persones.

Asina, nuna galería de 600 metros de llargor y xeometría variable, con 13 estaciones de monitorización y control, llévense a cabu ensayos con fueu empobinaos al diseñu d’I+D+i: la configuración y sistemes de ventilación, resistencia de materiales, equipos d’estinción, etcétera.

Amás, ellí fórmense y entrenen tamién brigaes d’emerxencia, de rescate, bomberos y personal de caltenimientu, nunes práctiques que siempre supervisa la Brigada de Salvamentu Mineru, que tamién usa estes instalaciones pa la so preparación.

 

   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies