Gobiernu del Principau d'Asturies

Asturies, muncho más cerca

Tas en

Asturias.es Temes Cultura Patrimoniu Históricu y Cultural 30 aniversariu del Prerrománicu asturianu como Patrimoniu Mundial
 

Patrimoniu Históricu y Cultural

30 aniversariu del Prerrománicu asturianu como Patrimoniu Mundial

Información sobre los actos conmemorativos del 30 aniversariu de la inscripción del Prerrománicu asturianu na Llista del Patrimoniu Mundial de la UNESCO

El 6 d'avientu de 1985 la UNESCO incluyó una selección de monumentos prerrománicos asturianos na Llista del Patrimoniu Mundial. Destacóse naquel momentu'l valor universal escepcional del que se definió como'l más completu y homoxeneu conxuntu d'arquitectura altomedieval de tol Occidente européu. Valoróse sobre manera'l fechu de qu'estos bienes nun tengan comparanza en cuantes al grau y calidá del caltenimientu del so estáu orixinariu.

El conxuntu d'edificios qu'integren l'Arte Prerrománicu Asturianu ta formáu por 15 construcciones representaes por doce templos y trés construcciones non cultuales.

La nómina de templos incluye Santuyano d'Uviéu (791-842), San Miguel de Lliño (842-850), Santa Cristina de L.lena (posterior a 848), Santu Adrianu de Tuñón (consagrada en 891), San Salvador de Valdediós (consagrada en 893), San Salvador de Priesca (consagrada en 921), San Pedru Nora (sieglu IX), Santa María de Bendones (sieglu IX), Santiago de Gobiendes (sieglu IX), Santa María d'Arbazal (sieglos VIII-IX), San Andrés de Bedriñana (posterior a 893) y la Cámara Santa de San Salvador d'Uviéu (sieglu IX).

Les construcciones ensin dedicar al cultu tán representaes por Santa María de Naranco (dedicación del altar en 848), La Torre Vieya de San Salvador d'Uviéu (sieglu IX) y Foncalada (sieglu IX).

Los edificios inscritos en 1985 na Llista del Patrimoniu Mundial pola UNESCO foron Santa María de Naranco, San Miguel de Lliño y Santa Cristina de L.lena, ampliándose en 1998 a otros trés monumentos: Santuyano, la Cámara Santa de la Catedral d'Uviéu y Foncalada. Nel 2015 inscribióse la ilesia de San Salvador de Priesca como bien vinculáu al Camín de Santiago costeru. Na actualidá tán realizándose les xestiones pa incluyir na Llista a San Salvador de Valdediós.

Pa conmemorar el 30 aniversariu d'esta reconocencia, diseñóse un programa variáu d'actividaes culturales. Dos esposiciones, nel Muséu Arqueolóxicu d'Asturies y en LAUDEO, Centru Cultural d'Estensión Universitariu, van amosar visiones poco conocíes del Prerrománicu. Tamién se va desenvolver, ente avientu y febreru, un ciclu de conferencies nel Muséu Arqueolóxicu d'Asturies, amás de xornaes técniques.

 Programa d'actos (pdf: 1 Mb)
 Programa de les Xornaes Científiques de febreru del 2016 (pdf: 273 Kb)