Gobierno del Principado de Asturias

Asturias, mucho más cerca

Estás en

Aniciu Temes Infraestructures y territoriu Territoriu y urbanismu POLA: Instrumentu de protección de la costa
 

Territoriu y urbanismu

POLA: Instrumentu de protección de la costa

Una nueva fase d'actuación activa na protección y potenciación de los valores del llitoral asturianu.

Playa de Barayo

Cola aprobación definitiva nel mes de mayu de 2005 del Plan Territorial Especial d'Ordenación del Llitoral d'Asturies (POLA), el Principáu d'Asturies inauguró una nueva fase d'actuación activa na preservación y potenciación de los valores del llitoral asturianu. Pel momentu fueron numberosos los instrumentos de planeamientu territorial y urbanísticu que procuraben la conservación de la nuesa costa, de la que la sociedá asturiana convieno en protexer dende va tiempu los sos altos méritos mediambientales y paisaxísticos. Como resultáu d'esta política, pue reconocese güei la gran calidá ambiental d'esti espaciu en comparanza coles comunidaes autónomes de la nuesa contorna: Asturies dispón de la mayor franxa costera protexida (300 quilómetros de llargor) del llitoral español como aseveren les estadístiques qu’ellabora’l Ministeriu de Mediambiente.

L'aprobación del Plan supón la finalización de la fase de protección asociada al POLA; enantes incluso de que s'iniciara la fase de dinamización con actuaciones que dan valor a les playes y el conxuntu de la costa, ameyorando l’usu y disfrute ciudadanu de la mesma.

 

Oxetivos

L'oxetivu básicu del POLA ye resolver la dialéctica utilización-preservación del llitoral modificando'l puntu d’equilibriu ente dambes de mou que, dando siempre prioridá a la segunda, tea potenciada la primera, facilitando l'accesu y ameyorando la calidá del usu recreativu. Porque la conocencia, el disfrute y l'apreciu polos ciudadanos de les cualidaes de la costa ye una de les meyores garantíes pa la so conservación.

Nel llitoral, un territoriu feble y particular, conflúin los intereses de diferentes actores, públicos y privaos. El POLA redactóse respetando escrupulosamente les competencies de les distintes alministraciones públiques, dende les entidaes locales a los distintos organismos de l'Alministración del Estáu. Los distintos periodos d'información público garanticen el so conocimientu per parte de los ciudadanos, que tuvieron ocasión de presentar les sos suxerencies y alegaciones. Entá siendo un procesu llargu d'ellaboración el resultáu ye un documentu qu'algama un nivel altu de consensu ente tolos axentes implicaos y en sintonía coles directrices de la Unión Europea sobre Xestión Integral de Zones Costeres. La firma nel mes de xunu de 2004 d’un Conveniu de Collaboración ente'l Principáu d'Asturies y el Ministeriu de Mediambiente pa la xestión integral del llitoral asturianu prueba'l reconocimientu pola parte del Gobiernu de la Nación de la calidá del POLA como modelu de desarrollu sostenible d'esi apreciáu ecosistema natural.

 

Instrumentos

Pa consiguir los sos oxetivos, el POLA plantega los instrumentos siguientes:

  • La delimitación del Suelu non urbanizable de Costes, espaciu reserváu de la edificación pa caltener les sos cualidaes mediambientales y paisaxístiques.
  • Una serie de propuestes actives: los parques-playa, la rede de siendes peatonales, les siendes cicloturistes y les actuaciones de rexeneración de la cubierta vexetal degradada.
  • Planes de desendolque p'actuar sobre aspectos específicos: árees degradaes pola edificación, núcleos rurales, árees arqueolóxiques, campamentos de turismu y redes d’alta tensión.

El conceptu más nuevu de los qu'introduz el POLA ye, ensin dulda, el parque-playa. Ye un instrumentu que quier compatibilizar la protección de les playes col disfrute por tolos ciudadanos. D'esta manera, la contorna de les sableres dótase con espacios llibres y equipamientos axeitaos y zones d'aparcamientu en ficies de lliberar del estacionamientu de vehículos zones de valor ecolóxicu y paisaxísticu como les dunes o les zones húmedes. El POLA propón 23 d'estos parques-playa, que tán en serviciu, inda enantes de la so aprobación definitiva, los de Penarronda (Castropol y Tapia) y Moniello (Gozón)

Pel 2006 ta en serviciu'l Parque-Playa de Frexulfe (Navia) y la 2ª fase de Penarronda lo mesmo que la sienda ente La Espasa y L'Arenal de Morís (Caravia). Terminen d'axudicase les obres de los parques playa de Rodiles (Villaviciosa) y de La Espasa (Caravia); les sos obres han emprimase enantes de la fin d'esti añu y tienen que tar en serviciu'l próximu branu.

Al mesmu tiempu, desendólquense otres actuaciones de parques playa per tola costa asturiana al través de convenios colos Conceyos y nel marcu del conveniu soscritu col Ministeriu de Mediambiente: Serantes (Tapia), Porcía (El Franco), Otur (Valdés), La Playa d'Artéu (Cuideiru), Aguilar (Muros), Los Quebrantos y Playón de Bayas (Sotu'l Barcu y Castrillón), Antromero (Gozón), La Ñora (Villaviciosa), Vega (Ribesella), Cue (Llanes) y La Franca (Llanes y Ribadeva).

Los parques-playa y los 232 núcleos rurales de la costa van tar comunicaos ente sí por aciu d’una rede de caminos peatonales, el Sistema de Siendes Costeres, reaprovechando unos 450 quilómetros de caminos yá esistentes complementaos con 150 quilómetros de tramos nuevos, xeneralmente d'unión ente aquéllos. L'usu de caminos y servidumes de pasu esistentes y el másimu respetu a los valores del paisax son los criterios de diseñu d'esta rede. Como exemplos yá executaos pue citase la sienda costera ente les playes de Navia y Barayu, la sienda d'accesu a la playa de Cueva en Valdés, la del Regolgueru en Ribadeva, la de Miou n'A Veiga y la de La Espasa-Arenal de Morís en Caravia. N'execución alcuéntrase la sienda Castropol-Figueiras pela ensenada de Liñeira. Tán yá proyectaes les siendes de Louza-Ortigueira en Cuaña, Portizuelu y Cadavéu-Cabu Bustu en Valdés, Bal.louta y Cabu Vidíu en Cuideiru, La Ñora-Tazones en Villaviciosa, Lluces-Vega (Colunga, Caravia y Ribesella) y Ribesella-Guadamía (Ribesella). Poles mesmes ta proyectada la sienda cicloturista ente Verdicio-Peñes-Bañugues en Gozón, anguaño en procesu d'espropiación del tarrén.