Gobiernu del Principau d'Asturies

Asturies, muncho más cerca

Tas en

Asturias.es Temes Cultura Retayos d'Asturies La Nieve
 

Retayos d'Asturies

La Nieve

Asturies apaez n'iviernu cubierta de mantos de nieve qu'ufierten al propiu y al turista posibilidades pal esquí y la alta montaña. Ún de los sitios más conocíos ye'l Puertu Payares, pero tamién L.leitariegos, Tarna o los Picos d'Europa sorprienden al que los conoz en branu, yá que n’iviernu’l paisaxe ye bien estremu.

Cuasi tolos deportes d'iviernu nacieron n'Europa, concretamente nos países montañosos y fríos.Los esquís más antiguos del mundu tienen alredor de 5000 años y afayáronse en Suecia. Dientro de los deportes d'iviernu, l’esquí ye'l deporte rei. L'esquí nórdico compriende pruebes de fondo y saltos. Llámase esquí alpino al que se pratica nes fasteres de los montes y entamó a practicase en 1880 nos Alpes. Tien cuatro especialidaes: descensu, slalom, slalom xigante y slalom superxigante. L'estilu llibre ye una modalidá reciente.

Una manera cenciella y personal d'evaluar el to nivel d'esquí ye la facilidá con qu’enfrentes el retu d'acceder a las distintes pistes. Los colores indiquen los niveles de dificultá de les mesmes. Verdes (fácil), Azules (media dificultá), Coloraes (difíciles) y Prietes (espertos), van date la midida del to nivel deportivu.

Na nieve, l'esquí y el snowboard representen al 95% d'aficionaos. El 5% restante inventa cada vegada nueves formes. El snowbike, los neumáticos, l’heliesquí, el parapente con esquís o el bigfoot formen parte del deporte d'aventura. Anque la verdadera aventura ye la de los neños y neñes baxando les cuestes nevaes en culosquí o improvisaos trineos.

Y falando de rapacinos, tampoco nun podemos escaecenos d'otru deporte tradicional, como ye'l llanzamientu de boles, nel qu'hai verdaderos profesionales.

La estación de Valgrande–Payares ye dende abenayá un puntu de referencia obligáu dada la so condición de principal vía de pasu al través del Cordal Cantábricu. La so estratéxica situación orográfica (a poco más de media hora de Lleón y d'Uviéu) xunto a les favorables condiciones orográfiques de la contorna fixeron que yá en 1953 s’instalaren nella los primeros remontes , convirtiéndose asina nuna de les estaciones de esquí más antigües d'España.

A esta tradición pal deporte blancu xúntase l’estraordinariu y reciente desarrollu de medios ya infraestructures pa la práctica del esquí. Cuenta con clínica deportiva, escuela d'esquí, alquiler de material y animadores deportivos. Trece remontes repartíos pelos distintos sectores de la Estación (telesquís y telesielles) posibiliten el descensu per quilómetros de pistes de diferentes graos de dificultá.

Los practicantes del esquí alpín, modalidá mayoritaria, alcuentren el sitiu axeitáu pa disfrutar del so deporte favoritu. El creciente númberu de fanáticos del snowboard y el monoesquí tienen tamién nes sos pistes el meyor escenariu pa quitar la galga al so maxín y estolax, tamién pela nueche. Los incondicionales del esquí de fondu cuenten con itinerarios específicos qu'atraviesen viesques y abruptos paraxes. D’igual forma, los amantes de la soledá, l'esfuerciu y los grandes espacios abiertos alcuentren nes cumes circundantes a la Estación un especial aliciente pa la práctica del esquí de travesía.

Payares ta arrodiáu de cumes como Cerra, La Picarota, Los Cel.leros, El Cuitu Nigru y El Cel.lón. Nes inmediaciones de la Estación tán dellos de los sectores más guapos del Cordal Cantábricu.

Les Ubiñes ufierten nos meses fríos un ambiente alpín asorante y son tou un retu pa los prácticantes del montañismu. Perbaxo de los cumes, hai pueblos que siguen inalteraos col pasu del tiempu y redolaes de viesques como Valgrande, de gran valor ecolóxicu por ser zona de refuxu d’especies en víes d'estinción como l’osu pardu cantábricu, el llobu y el faisán.

Una amplia ufierta d’establecimientos hoteleros permiten al visitante disfrutar del merecíu descansu y d'una variada gastronomía. Otru sitiu pal turismu d'iviernu ye 'l Puertu'l Pontón, al que s'accede dende Cangues d’Onís, per Asturies, al través del escobiu de Los Beyos. A partir d'Oseya de Sayambre y peles zones de Panderrueda y Valdeón, en Lleón puen facese rutes prestoses pal esquí de travesía.

Na otra punta, nel occidente, ta'l Puertu de L.leitariegos, a 35 km. de Cangas del Narcea, que comunica con otra estación na fastera lleonesa, que ye mui usada polos d’occidente pa la práctica del esquí. El puertu más conocíu del país vecín ye’l Puirtu Braña (San Isidro), que ye'l que tien meyores instalaciones. Hai travesíes yá clásiques, como la de Payares-Puirtu Braña.

Los Picos tienen tamién zones como Ario o Vegarredonda abondo apreciaes polos amantes desti deporte. Anque pa realizar esquí de fondu o facer escursiones per picos, el sitiu ideal ye'l Parque Nacional de la Montaña de Cuadonga. Les rutes parten de Los Llagos, que ye fácil ver xelaos. El contraste, pal que los conoz pel branu, ye espectacular pola intensidá de la lluz y los cumes blancos perablucantes que los arrodien.

Nel puertu de Tarna tamién podemos atopar instalaciones óptimes pa pasar unos díes na nieve. Accédese pel corredor del Nalón; remontando’l ríu llegamos a una estación d’esquí, pequeñina pero mui afayadiza.

Na mayoría de los sitios vas poder contactar con Guíes de Montaña y hai braves empreses de turismu activo qu’organicen actividaes qu’inclúin agospéu, cusinos, tresllaos, etc.

Fuera de les estaciones y les rutes señalizaes, hai que tener munchu cuidáu, yá que la visibilidá pue perdese pela nieve y la borrina en cuestión de minutos, y ye fácil tresmanase o depeñase.Toles temporaes hai accidentes mortales, mesmo ente los más avezaos, asina que si vais solos aconséyovos dir con guía o, polo menos, avisar nel últimu pueblu del camín que vais siguir. Pente la naturaleza xabaz, toles precauciones son poques.

 

Estación d'esquí de Payares

Estación d'esquí de L.leitariegos