Gobiernu del Principau d'Asturies

Asturies, muncho más cerca

Tas en

Asturias.es Temes Cultura Retayos d'Asturies Turismu Activo
 

Retayos d'Asturies

Turismu Activo

Coles condiciones naturales d'Asturies, les posibilidáes de vivir esperiencies albentestate nun tienen tope. Cualquiera fecha del añu ye bona, yá qu'hai actividáes adaptaes a toles estaciones.

Pa ello, esisten numberoses empreses que s'encarguen de canalizar les inquietúes de los visitantes, garantizando en tou momentu la so seguridá personal. Una escelente infraestructura hostelera da cobertura a cuestiones como la gastronomía y el descansu. N'Asturies hai más de 70 empreses de turismu activo qu'ufierten: montañismu, piragüismu, caballos, mountain bike, 4x4, globu, parapente, barranquismu, espeleoloxía, tiru con arcu, quad, hidrospeed, bucéu, esquí, vela, surf.., namas nomando los más conocíos.

Dacuales d'estes empreses xestionen al mesmu tiempu los edificios conocíos como albergues, qu'en númberu superior a los 70 ufierten aproximadamente 4.000 places. Los albergues tienen de capacidá ente 8 y 200 places n’habitaciones dobles, triples, cuádruples y múltiples, la mayoría con bañu na planta.

Asturies ta cubierta por una rede de pistes y siendes pa tolos gustos, que permiten facer dende curtios paseos al atapecer hasta escursiones que duren dellos díes. Nes montañes y valles del interior, la escalada, el trekking y les rutes cicloturistes ufiértense como oportunidá deportiva al visitante que busca emoción y aventura. Subir a picos arispios o escolingase pelos cañones que l’agua escavó a los sos deleres na tierra, provoquen sensaciones máxiques. A pies, en bicicleta , a caballu o en tou-terrén, fadremos inolvidables travesíes.

Tamién se pue volar coles propies ales o en globu sobre paraxes inalgamables, somorguiase nel vacio y dominar d'una sola güeyada la mar y la montaña. O pasear al llombu d'un caballu pela playa o pelos valles interiores. Y adentrase nes coraes de la tierra pa investigar lo inesplorao na oscuridá y descubrir sitios encantáos.

El riesgu y la emoción son el denominador común a tolos deportes d'aventura, por embargu, el riesgu nun ye en toos lo mesmo. El senderismu, el barranquismu y el ponting son, por exemplu, trés formes asemeyaes pero distintes de vivir l'aventura. En conciencia, nun se pue dicir que'l senderismu seya un deporte arriesgáu. Nun siendo en delles escepciones, los Senderos de Gran Percorríu nun comporten dengún peligru nin esixen una forma física d'altu nivel. Nel barranquismu el riesgu ye más eleváu, anque coles precauciones precises nun tien por qué resultar peligrosu. Nesti sí que necesites bona forma física y conocer técniques específiques, como'l descensu con cuerdes, nalar, etc.

Hai que tener tamién los nervios bien templaos, p'afrontar les situaciones límite que puean presentase. El ponting, más qu'un deporte, ye verdadera aventura; más que de músculos falamos de valor y decisión, qu'hai que tenelos pa saltar al vacio dende una ponte con una cuerda atada a la cintura. A pesar de lo espectacular, ye una de les actividaes más segures qu’esisten: l’índiz d'accidentes en ponting ye cuasi nulu.

Anque nengún supera los 3.000 metros, los picos asturianos son un desafíu pa los montañeros. Pero nun falamos namas d'ascensiones, la escalada ye ensin dulda el deporte d'aventura que más tradición tien nesta tierra. Recordemos el míticu Urriellu. Tamién la escalada en xelu, que combina la escalada y l'esquí, ye mui frecuente na zona de Picos. Pa rutes mestes, que concentren toles dificultaes (cascaes, ramples, resaltes..) son clásiques les cares norte de Peña Santa, Torre Sta. María de Enol y Penubina.

Y si nun quies baxar otra vegada, pues facelo en parapente. El paracayíes de pendiente pertenez a la familia del paracayíes y l'ala delta, y anque ye más reciente qu'estos, ta muncho más espardíu. Metá mineru, metá escalador, l’espeleólogu intérnase nes entrañes de la tierra pa sentir el ruíu del silenciu, namas allumáu pol carburu del so cascu.
Los terrenos calizos del oriente son un paraísu pa los amantes de les cueves. La mountain bike designa non solo una triba de bicicleta, sinon tamién un deporte. Estes bicicletes tou-terrén (BTT) estremaes de les tradicionales de paséu, permiten dir campu al través y subir y baxar pendientes. Hai que dir bien preparáu, pero ye ún de los más gratificantes

Los cuasi 375 quilómetros de costa con más de 100 playes y los sos ríos, bien caudalosos, convierten al Principaú d'Asturies nel escenariu acondáu pa los deportes náuticos y acuáticos. Un ampliu ábanu d'empreses especializaes atienden al visitante y resuelven les incidencies pa realizar cómodamente estes práctiques deportives. La variedá de los fondos llitorales inviten a la práctica del submarinismu.

Descubrir puertos marineros o contemplar los Picos dende alta mar, adentrase nes ríes o baxar calces son dacuales de les posibilidáes. L'aventura de navegar pelos ríos d'agua bravo nació como necesidá p'acceder a nuevos sitios, conquistar territorios inesploraos o tresportar mercancies. Sicasí agora hai dellos deportes que tienen en común el descensu de ríos rápidos y caudalosos en embarcaciones que la corriente arrastra mientres los navegantes intenten controlar el cursu y la dirección.

El piragüismu inclúi dos modalidaes: el kayak (la embarcación desplázase con una pala de doble fueya) y la canoa (piragua que que se manexa con una pala d'una sola fueya). El rafting ye una modalidá d'agua bravo que consiste en descender un ríu nun bote neumáticu cola ayuda de remos. L’hidrobob practícase nun bote con forma de proyectil sobre’l que s’amiya sentáu, y non dientro. El deportista recibe directamente l'agua y la espluma ensin que nada-y faiga de parapetu.

Y pa los que busquen emociones fuertes ta l’hidrospeed. Nesti deporte, navégase sobre una plancha col cuerpu prácticamente dientro l'agua. Les emociones tan garantizaes. Y tamién pa los amantes del agua, pero de la mar, los deportes estrella son el surf, el windsurf y el funboard. El surf básicamente trata de regresar de mar adientro cabalgando sobre les foles (surf-riding), usando l'impulsu creáu pola so propia pendiente y ayudaos por una plancha. El surf a vela o windsurf combina elementos de la navegación y permite la mesma. Cuando se fai surf de ola pero con vela, llámase funboard.

Y nun podemos escaecenos del vehículu más ecolóxicu y económicu qu'esiste, la bicicleta. Dientro del cicloturismu, qu'asina se llama al ciclismu non competitivu, podemos distinguir dos tribes: los ciclodeportistes, que suelen tar organizáos en clubes, entrenaos, y que percuerren quilómetros per carretera o ascienden a puertos míticos, y los cicloturistes d'alforxes, que son los qu'usen la bicicleta pa viaxar y conocer mundu. Anque seyan actividaes estremaes toes tienen un denominador común: que se realicen albentestate. D’esta manera, l’amor a la naturaleza ta presente nellos y delles vegaes amiéstense toles técniques. Pa toos ellos ye preciso tener un migayín d'orientación. Hai que saber interpretar los mapes, escoyer la escala más afayaíza, calcular les distancies y, polo menos, manexar la brúxula. Y atentos a los partes, que’l tiempu, tanto nos picos como na mar, ye abondo cambiante.

Una alvertencia pa cualesquier deporte: ponéivos en manes de profesionales, que los hai pa toles actividaes. Non solo vais dir más seguros, sinon que van llevavos a los meyores sitios y col equipu necesariu pa cada casu. Y, por favor, intentái que'l vuesu pasu se note lo menos posible. Recordái qu'a Adán y Eva nun los echaron del Paraísu por comer la mazana, sinon por tirar la gaspia al suelu.