Gobiernu del Principau d'Asturies

Asturies, muncho más cerca

Tas en

Asturias.es Gobiernu Acuerdos del Conseyu de Gobiernu
 

Acuerdos del Conseyu de Gobiernu

  1. mayo
  2. 21 de mayo de 2020
    Alcuerdos del Conseyu de Gobiernu: 21/05/2020
    • El Principáu financia trés convocatories de subvenciones que va xestionar l’ Idepa
    • El desenvolvimientu de centros d'I+D+i en grandes firmes, un programa de nueva creación, cuenta con 4 millones de presupuestu
    • Los autónomos, pymes y microempreses obligaos a par la so actividá por causa de la covid van poder aplazar y fraccionar les sos deldes tributaries hasta'l 31 d'agostu, trés meses más de lo previsto

    El Conseyu de Gobiernu aprobó güei un gastu de 8,3 millones destinaos a trés convocatories de subvenciones que tienen por oxetu impulsar y sofitar los proyectos d'investigación, desenvolvimientu ya innovación de les empreses asturianes.

    Los fondos vienen de la Conseyería de Ciencia, Innovación y Universidá y van ser xestionaos pol Institutu de Desenvolvimientu Económicu (Idepa). Les ayudes, dalgunes de nueva creación, diríxense a financiar los planes d'actuación de los centros d'I+D+i de grandes empreses, facilitar la execución de proyectos d'investigación empresarial ya impulsar la creación y afitamientu de firmes de base tecnolóxica.

    Planes pa centros d'I+D+i de grandes empreses

    La convocatoria de subvenciones empobinaes a la execución de planes d'actuación pa centros d'I+D+i empresariales ta dotada con 4 millones. Esta llinia, de nueva creación, pretende visibilizar la exstencia d'estos centros y facilitar a estes entidaes la puesta en marcha de los sos planes d'investigación, cola fin d'ameyorar la competitividá de les compañíes y actuar, amás, como elementu tractor de la economía.

    Van sufragase gastos relativos a activos fixos, personal técnicu, materiales, collaboraciones esternes y alquisición de patentes pa proyectos que cunten con un gastu subvencionable de 200.000 a 2.000.000 euros.



    • Proyectos d'investigación y desenvolvimientu en pymes

    La convocatoria pública de subvenciones empobinaes a empreses asturianes pa la execución de proyectos d'I+D va cuntar con 3,6 millones. Esta llinia pretende fomentar la puesta en marcha d'iniciatives d'investigación y desenvolvimientu nel marcu de la Estratexa Rexonal d'Especialización Intelixente (Asturies RIS3), coles mires d'ameyorar la competitividá, notablemente nel segmentu de les pymes.

    Los proyectos tendrán d'encuadrase na investigación industrial o'l desenvolvimientu esperimental, realizaos pola mesma empresa o subcontrataos a un provisor esternu d'I+D, que tamién va poder executar estudios de viabilidá.

    Subvenciones pa empreses de base tecnolóxica

    La convocatoria de subvenciones empobinaes a empreses de base tecnolóxica cuenta con 700.000 euros. L'oxetivu ye fomentar la creación, desenvolvimientu y afitamientu d'esti tipu de firmes que realicen proyectos nel marcu de la estratexa Asturies RIS3.

    Resultaos 2019

    La convocatoria empobinada a proyectos d'I+D resolvióse en 2019 cola aprobación de 85 iniciatives que xeneraron casi 13,5 millones d'inversión, a los que se-yos concedió una subvención de 5,2 millones.

    Pela so parte, na llinia empobinada a empreses de base tecnolóxica aprobáronse 15 proyectos, con una inversión xenerada de 1,6 millones y una subvención concedida de 920.598 euros.

    Estes convocatories de subvenciones van poder ser cofinanciaes pola Unión Europea al traviés del Fondu de Desenvolvimientu Rexonal (Feder).



    Ampliáu l'aplazamientu de deldes tributaries

    L'Executivu aprobó'l cambéu del decretu que dexa l'aplazamientu y fraccionamiento ensin intereses de les deldes tributaries de trabayadores autónomos, pymes y microempresas obligaes a palizar la so actividá arriendes de la COVID-19.

    El cambéu facilita que se retarden o estremen les deldes hasta'l 31 d'agostu, trés meses más de lo previsto primeramente, cuidao que nel decretu orixinal el plazu termina’l 31 de mayu.

    D'esta miente, pretende solliviase no posible la situación financiera d'estos contribuyentes: al poder pagar más tarde, van disponer de más recursos pa encarar les consecuencies de la emerxencia sanitaria.



    461.264 euros pal dragáu del puertu de Llanes

    El Conseyu de Gobiernu autorizó un gastu de 461.264 euros pa contratar les obres de dragáu del puertu pesqueru de Llanes, que van tener un plazu d'execución de cuatro meses. L'actuación va permitir llograr caláu suficiente pa facilitar el saléu na canal y l'amarre na dársena en condiciones de seguridá.

    La Conseyería d'Infraestructures, Mediu Ambiente y Cambéu Climáticu adelantró a anguaño'l dragáu, que se va realizar con una máquina retroexcavadora, a la que se va acoplar un estensor col fin d'algamar los puntos más alloñaos del cantil. El material que se va estrayer, más de 5.000 metros cúbicos, va atropase nel puertu pa esaniciar agua del sedimentu que, darréu, va tresportase a un xestor autorizáu.

    La Dirección Xeneral d'Infraestructures realizó en marzu obres previes al dragáu completu del puertu pesqueru, coa fin d'estenar la canal de navegación y ameyorar l'accesu al mesmu y, especialmente, a la dársena pesquera, énte l'entamu de la temporada de la xarda. Amás, apocayá acometió llabores d'estracción d'ocla nel puertu deportivu, con un costu de 46.000 euros, pa retirar los restos vexetales atropaos na zona más interior de la dársena.



    Contratos d'emerxencia nel Sepepa contra la COVID-19

    Tamién s'autorizaron dos contrataciones d'emerxencia per parte del Serviciu Públicu d'Empléu (Sepepa), por importe de 175.072 euros, pa la incorporación de midíes de protección y prevención frente a la COVID-19, y la regulación de los fluxos d'entrada y movimientu nes oficines d'empléu.

    Concretamente, el Sepepa va destinar 140.168 euros pa incorporar a 10 vixilantes n'otres tantes oficines d'Uviéu, Xixón, Avilés II, Mieres, Llangréu, Pola de Siero y Llugones, y a dos auxiliares de puerta en puntos d'atención de Xixón y Avilés. En dambos casos, trátase d'oficines con 3.000 o más persones demandantes d'empléu.

    Coles mesmes, prevése la compra de 403 mampares de policarbonato de protección pa instalales nos puestos d'atención al públicu y garantizar la protección de los técnicos nel so trabayu.



    Ver en formatu orixinal (PDF : 173 Kb )
  3. 14 de mayo de 2020
    Alcuerdos del Conseyu de Gobiernu: 14/05/2020
    • Nueve ayuntamientos firmen un alcuerdu de collaboración cola Conseyería de Derechos Sociales p'acelerar les valoraciones con 12 profesionales
    • L'Alministración contrata a 14 trabayadores sociales, alministrativos y otros tantos auxiliares cola fin d'entainar el cobru de les ayudes
    • El Principáu va conceder subvenciones directes de 700 euros a quien trabayen por cuenta propia nel sector cultural

    El Gobiernu d'Asturies aprobó güei l'alcuerdu qu'autoriza la firma de convenios con nueve conceyos pa encamenta-yos la valoración de la dependencia de persones que presentaren solicitúes nestos conceyos y tean pindios d'evaluación. Esta midida va dexar que 12 profesionales de Boal, Cangas, Casu, Castropol, Coaña, Eilao, Pezós, Tinéu y Villayón desempeñen esta función, depués de recibir formación na aplicación del baremu nel próximu mes.

    Amás de la puesta en marcha d'esta iniciativa, que s'articula nel plan de choque 2019-2021 como un proyectu pilotu, el Principáu va contratar a otros 22 profesionales (14 trabayadores sociales, 4 alministrativos y 4 auxiliares), que se van incorporar como personal de refuerzu'l 1 de xunu col propósitu d'acabar coles llistes d'espera na dependencia. D'esta miente, dóblase'l númberu de trabayadores sociales dedicaes anguaño a la ellaboración de los programes individuales d'atención (PIA) y aumenta el personal que s'ocupa de la xestión de los espedientes.

    Per otra parte, nes próximes selmanes van reiniciase les valoraciones d'aquelles persones que la so situación seya más grave o esixa una intervención urxente.

    Finalmente, la conseyería va empezar de manera inminente la tramitación de la normativa que completa y amplía el catálogu de prestaciones del Sistema pa l'Autonomía y Atención a la Dependencia. Per un sitiu, va regulase la figura del asistente personal y, por otru, los servicios de promoción de l'autonomía. L'oxetivu ye reforzar la ufierta d'atención domiciliaria y de fomentu de la vida independiente, pa que pase a ocupar un llugar preferente nel modelu de sofitu a les persones dependientes.

    La ellaboración d'esta norma va venir precedida por un ampliu procesu participativu, un fechu avezáu na toma de decisiones de la Conseyería de Derechos Sociales y Bienestar.



    Medio millón pa sofitar la cultura

    El Conseyu de Gobiernu, a propuesta de la Conseyería de Cultura, Política Llingüística y Turismu, aprobó güei una partida de 500.000 euros destinada a subvenciones directes de 700 euros pa trabayadores por cuenta propia del sector cultural. Esta midida tien por oxetu amortiguar los efectos de la crisis sanitara provocada pola COVID-19.

    Les persones destinatarias d'estes midíes correspuéndense con una parte del gremiu cultural que, pola singularidá del so trabayu, nun puede optar a otres ayudes puestes en marcha pol Gobiernu central o'l Principáu.

    El procesu pa optar a les subvenciones va habilitase por aciu tramitación telemática y la so concesión va tar supeditada a una serie de requisitos que van facilitar la valoración y la xestión de les propuestes. El plazu pa presentar les solicitúes va ser d'un mes a partir de la entrada a valir del decretu aprobáu esta mañana.



    Tresferencia a Asturex

    El Conseyu de Gobiernu tamién autorizó al Institutu de Desenvolvimientu Económicu (Idepa) a efectuar una tresferencia de 500.000 euros pa financiar les actividaes de la Sociedá de Promoción Esterior (Asturex). Los fondos diríxense a la puesta en marcha, nesti exerciciu, de programes de fomentu del interés internacional de les empreses asturianes, de sofitu a la diversificación de mercaos internacionales y d'asesoramientu y sofitu a la esportación.

    Asturex ye la entidá de referencia pa la promoción del comerciu esterior de les firmes asturianes. Constituyida en 2005, el so oxetu social ye la organización d'actividaes de promoción internacional directa como feries, misiones y otres actividaes que s'encamienten nel ámbitu de la internacionalización. Ta participada nel 55% pol Idepa y el 45% restante divídense ente la Fade, les cámares de comerciu d'Uviéu, Xixón y Avilés y Liberbank.



    Cese na Conseyería de Derechos Sociales

    El Gobiernu d'Asturies aprobó'l cese de Trinidad Suárez como directora xeneral de Servicios Sociales y Mayores. L'Executivu estima los servicios emprestaos por Suárez dende'l so nomamientu, el 13 de setiembre de 2019.



    Ver en formatu orixinal (PDF : 56 Kb )
  4. 4 de mayo de 2020
    Alcuerdos del Conseyu de Gobiernu: 30/04/2020
    • L'Executivu va responde por una llinia de financiación específica p’autónomos y pymes del sector dotada con 5 millones
    • La campaña de promoción, con un presupuestu de 2,8 millones, va concentrase nel mercáu nacional y va reforzar la imaxe del Principáu como destín saludable pola so calidá medioambiental y escasa masificación
    • Autorizáu un gastu de 495.000 euros para promover la equidá ente l'alumnáu y combatir el fracasu escolar
    • La Conseyería de Facienda y el Colexu d'Economistes van ufiertar sofitu telefónicu a la ciudadanía pa la campaña de la renta 2019

    La conseyera de Cultura, Política Llingüística y Turismu, Berta Piñán, informó güei al Conseyu de Gobiernu sobro la puesta en marcha d'una serie de midíes pa la reactivación del turismu n'Asturies énte l'impactu de la emerxencia sanitaria provocada pola COVID-19. Les cuatro llinies d'actuación nes qu’articularán estes midíes van movilizar más de 8 millones y son les siguientes: ayudes al sector, sofitu a la creación y comercialización de productos, reorientación de les campañes de promoción y formación pa profesionales.



    • Ayudes al sector

    La primera de les midíes tien como oxetivu procurar la supervivencia de les empreses afectaes pola crisis. Con esti fin, el Principáu va habilitar una llinia de financiación específica p'autónomos y empreses turístiques d'hasta 20 emplegaos, con una dotación de 5 millones.

    Estos préstamos, dende 5.000 hasta 20.000 euros, van tar suxetos a un interés fixu del 1,5% o variable según Euribor +1,5%; van tener un añu de falta y un plazu d'amortización d'hasta 7. L'Executivu asturianu va sofitar tola operación, al asumir los gastos d'apertura y cancelación, mesmo que la comisión d'aval.



    • Creación y comercialización de productos

    Dientro del grupu de trabayu creáu con representantes del sector, l'Executivu analiza diverses fórmules pa xenerar y comercializar productos empobinaos al viaxeru nacional que supongan una ventaya competitiva frente al restu de destinos. La Viceconseyería de Turismu optó por avanzar en propuestes basaes na calidá y la sostenibilidá, que refuercen el potencial de la ufierta asturiana, mesmo que los sos recursos de naturaleza, gastronomía y patrimoniu cultural.

    Tocantes a la comercialización, estúdiense midíes que favorezan l'aumentu del númberu de reserves por aciu campañes de promoción, aprovechando l'algame del portal @www.turismoasturias.es, que recibe más de 4,3 millones de visites añales.

    La Conseyería de Cultura, Política Llingüística y Turismu prevé destinar 500.000 euros pa dambes midíes.



    • Promoción

    La inversión en promoción va reorientase acordies con la coyuntura de los mercaos. Por ello, los esfuerzos van centrase na campaña nacional, con especial atención al turismu internu y a los mercaos de proximidá. Les acciones internacionales van llimitase a les comprometíes antes de la irrupción de la crisis, cola previsión de reactivales nel cuartu trimestre del añu.

    Unu de los principales oxetivos de les acciones de promoción nacional, que van cuntar con 2,8 millones, ye reforzar l'enfotu del turista n'Asturies como un destín saludable: un llugar seguru de vacaciones polos sos valores de sostenibilidá, preservación del mediu ambiente, calidá y ausencia de masificación.



    • Formación

    Otru de los propósitos ye asegurar l'adaptación de los profesionales a les exixencies y retos que va traer consigo la nueva normalidá. Pa ello, tán entamándose acciones de teleformación nes que la seguridá va ser prioritaria. Estes acciones complementen a les incluyíes nel programa Anfitriones, impulsáu pol Ministeriu d'Industria, Comerciu y Turismu, nel que tamién collabora'l Principáu.

    Estes midíes específiques pal sector turísticu súmense a los 32 millones n'ayudes habilitaos pol Gobiernu d'Asturies y a les que tamién pueden aportar autónomos y empreses turístiques.



    Mediu millón pa prevenir el fracasu escolar

    L'Executivu autorizó un gastu de 495.000 euros pa financiar subvenciones a asociaciones, oenexés ya instituciones privaes ensin ánimu d'arriquecimientu pa impulsar actuaciones de compensación educativa nel Principáu nel bieniu 2020-2021. De la partida total, 351.000 euros correspuenden a esti añu y 144.000 euros, al próximu. Estes ayudes, dirixíes a favorecer la equidá ente l'alumnáu, cunten con financiación del Ministeriu d'Educación y Formación Profesional y del Fondu Social Européu (FSE), nel marcu del Programa Operativu d'Empléu, Formación y Educación 2014-2020.

    La finalidá d'estes subvenciones ye amenorgar y prevenir el fracasu escolar y, poro, l'abandonu tempranu. #Tratar de favorecer l'ésitu del alumnáu escolarizáu en centros sosteníos con fondos públicos que s'atopa en situación de desventaxa al traviés de diverses actuaciones que van beneficiar, prioritariamente, a estudiantes de 5º y 6º de Primaria y d'Educación Secundaria Obligatoria (ESO).



    Asesoría a los contribuyentes pal IRPF

    El Gobiernu d'Asturies impulsa un añu más el conveniu col Colexu d'Economistes pa contratar a un máximu de 32 titulaos universitarios con conocencies n'asesoría fiscal pa reforzar l'equipu que va atender a los contribuyentes na campaña de la renta.

    L'Executivu va apurrir 96.000 euros pa financiar el conveniu, ente que la entidá colexal va encargase de la elección de los técnicos ente titulaos desemplegaos que cursaren el Máster n'Asesoría Fiscal y Práctica Profesional o'l Cursu d'Espertu nel Impuestu sobre la Renta de les Persones Físiques (IRPF) ya Impuestu sobre'l Patrimoniu qu'entama'l mesmu Colexu d'Economistes.

    Ante la situación xenerada pola emerxencia sanitaria, ta previsto qu'anguaño que l'atención s’empreste per vía telefónica y non presencialmente, polo menos nes primeres selmanes. Esti serviciu de sofitu a la ciudadanía va empezar el 13 de mayu.

    Tola información rellacionada cola campaña de la renta, que s'empecipió'l 1 d'abril y va rematar el 30 de xunu, según la solicitú d'ayuda pa la presentación de autoliquidaciones atópase disponible na web: https://www.agenciatributaria.es/AEAT.internet/Renta.shtml



    Ver en formatu orixinal (PDF : 174 Kb )

Buscar mas acuerdos

Buscar
Desde
/
/
Hasta
/
/

Información sobre el documento

© Copyright 2006. Gobiernu del Principau d'Asturies