Gobiernu del Principau d'Asturies

Asturies, muncho más cerca

Tas en

Asturias.es Gobiernu Acuerdos del Conseyu de Gobiernu
 

Acuerdos del Conseyu de Gobiernu

  1. abril
  2. 8 de abril de 2020
    Alcuerdos del Conseyu de Gobiernu: 08/04/2020
    • Estes subvenciones individuales, de 400 euros, van facilitar el pagu de gastos fixos como arriendos, préstamos y suministros
    • L'Executivu aplaza seis meses el pagu de les deldes tributaries de trabayadores por cuenta propia, pymes y microempreses que venzan antes del 1 de xunu
    • El Principáu habilita una cuenta bancaria pa recibir donaciones que se van dedicar a la llucha contra'l coronavirus: YE23 2048 0001 7034 0401 1498
    • Facienda va reorganizar los creitos presupuestarios col fin d'empobinar tolos recursos necesarios a cubrir la emerxencia sanitaria
    • Aprobáu un gastu de 1,5 millones pal abonu de los servicios d’asistencia xurídica gratuita del cuartu trimestre de 2019

    El Gobiernu d'Asturies aprobó güei una partida de 4.000.000 euros pa la convocatoria, con calter estraordinariu, d'una llinia d'ayudes directes pa persones trabayadores por cuenta propia o autónomes, que les sos actividaes quedaren suspendíes por causa de la declaración del estáu d'alarma (Real Decretu 463/2020, de 14 de marzu).

    Estes subvenciones formen parte del bloque de diez midíes socioeconómiques aprobaes el 26 de marzu pol Executivu autonómicu y tienen calter finalista. El so oxetivu ye sofitar a los autónomos nel pagu de los gastos fixos que tienen d'encarar a pesar de tener los sos negocios zarraos. Concretamente, van dirixíes a cubrir arriendos de locales o cuotes hipotecaries, cuotes mínimes de suministros d'eletricidá, combustibles, agua, telefonía y conexón a internet, seguridá, gastos d'asesoría fiscal y contable, seguros, publicidá y redes sociales, gastos financieros y alquisición y caltenimientu de software, ente otros conceptos.

    L'ayuda individual prevista xube a 400 euros nell tiempu de suspensión obligatoria de l'actividá, polo que s'envalora un total de 10.000 persones beneficiaries.

    Esta llinia ta regulada por unes normes especiales qu'establecen que van poder solicitar les ayudes les persones físiques qu'exerzan la so actividá n'establecimientos abiertos al públicu, allugaos nel Principáu y con casa fiscal na comunidá, que seyan trabayadores autónomes y desenvuelvan dalguna actividá que la so apertura al públicu quedara suspendida. Tamién van poder acoyese quien desenvuelvan el so trabayu al traviés d'una comunidá de bienes, siempre y cuando soliciten la subvención a títulu personal.

    Pa optar a l'ayuda va ser necesario llograr un rendimientu netu amenorgáu de les actividaes económiques declaraes nel exerciciu 2019 igual o inferior a 30.000 euros.

    El plazu de presentación de solicitúes va ser d'un mes dende l’otru día hábil al de la publicación del decretu de convocatoria nel Boletín Oficial del Principáu (Bopa), que correspuende col llunes 13 d'abril.

    Al respective de la tramitación de les ayudes, y acordies con los encamientos de les autoridaes sanitaries pa prevenir l'espardimientu del coronavirus, habilitóse un procedimientu telemáticu na sede electrónica del Principáu, a la que s'apuerta al traviés de la siguiente dirección: https://sede.asturias.es/

    Les solicitúes van dirixise al Serviciu d'Entamadores y Economía Social, con códigu d'identificación AYUD0193T01, y van poder tar roblaes electrónicamente col certificáu dixital de cualesquier de les asociaciones de trabayadores autónomos y asociaciones empresariales del Principáu, centros d'empresa públicos, cámares de comerciu, asesoríes fiscales o xestoríes contables. Estos organismos y entidaes tendrán de tener na so poder el documentu acreditativu de la representación otorgada pola persona solicitante, cuidao que va poder ser riquíu pa llabores de comprobación y control.

    Facilidaes fiscales y donaciones

    El Gobiernu d'Asturies tomó güei xuna nueva decisión fiscal pa sofitar a la ciudadanía na llucha contra la pandemia del coronavirus: aprobó'l decretu que fai posible l'aplazamientu y fraccionamiento, por un plazu máximu de 6 meses y ensin intereses, de les deldes tributaries de trabayadores autónomos, pymes y microempresas que se vieren obligaes a palizar la so actividá.

    La midida va afectar a aquelles deldes que venzan antes del 1 de xunu y estiéndese a tolos tributos que xestiona'l Principáu, tanto los impuestos vencíos como los mesmos y los locales.

    Esta nueva norma súmase al decretu d'urxencia del 23 de marzu que suspende los plazos acomuñaos a los tributos que xestiona l'Alministración pública mientres l'estáu d'alarma. Dambes midíes escuerren ufiertar respaldu a la población énte les consecuencies económiques derivaes de la crisis sanitaria.

    El mesmu decretu aprobáu güei inclúi una disposición adicional na que se regulen les donaciones de dineru pa facer frente al COVID-19. Esta iniciativa tomóse a partir de les solicitúes recibíes pol gobiernu con esi envís. La disposición adicional establez que los fondos que se reciban van poder xenerar creitu presupuestariu pa l'Alministración y que van tener como únicu y esclusivu fin la cobertoria de los gastos venceyaos a la llucha contra'l coronavirus; por casu, atender gastos d'equipamientos ya infraestructures sanitaries, material, suministros, contratación de personal, investigación o midíes pa compensar l'impactu sobre la economía. Amás, el Principáu va poder aceptar donaciones de material y suministru con independencia de cuál seya la entidá del sector públicu al que vaigan destinaes.

    Les entidaes y particulares qu'asina lo deseyen pueden materializar les donaciones nuna cuenta bancaria habilitada pa tal fin: YE23 2048 0001 7034 0401 1498.



    Reorientación de los recursos disponibles

    Tamién en relación cola crisis sanitaria, el Conseyu de Gobiernu alcordó habilitar a la Conseyería de Facienda pa reorganizar los creitos presupuestarios de 2020 col fin de movilizar tolos recursos disponibles pa frenar la epidemia y les sos consecuencies pa la ciudadanía. La emerxencia derivada del coronavirus y la posterior declaración del estáu d'alarma provocaron cambeos sustanciales al respective de la situación na que s'aprobaron los presupuestos pa 2020.

    Por esta razón, l'Executivu autonómicu considera urxente reorganizar los creitos disponibles pa gastos, col fin d'empobinar los máximos recursos posibles a la llucha contra'l *COVID-19.



    Fondos p'asistencia xurídica gratuita

    El Conseyu de Gobiernu aprobó la concesión de subvenciones por un importe global de 1.517.488 euros a los colexos profesionales d'abogaos y de procuradores d'Uviéu y Xixón pola prestación de los servicios d'asistencia xurídica gratuita correspondientes al cuartu trimestre de 2019.

    Estes ayudes garanticen un derechu fundamental pa la ciudadanía: tutelar xudicial efectiva pa toes aquelles persones qu'escarecen de recursos económicos pa litigar. Les subvenciones, que sufraguen servicios yá emprestaos y caltienen la regularidá nos pagos trimestrales a les entidaes colexales, distribúyense de la siguiente manera:

    • Colexu d'Abogaos d'Uviéu: 908.046 euros.
    • Colexu de l'Abogacía de Xixón: 458.999 euros.
    • Colexu de Procuradores d'Uviéu: 114.269 euros.
    • Colexu de Procuradores de Xixón: 36.173 euros.



    Ver en formatu orixinal (PDF : 177 Kb )
  3. 2 de abril de 2020
    Alcuerdos del Conseyu de Gobiernu: 02/04/2020
    • Estes llinies de la PAC contribuyen a la viabilidá económica de les esplotaciones y amenorguen el riesgu d'abandonu de l'actividá productiva
    • Aprobáu un gastu de 1,3 millones pa subvenciones dirixíes a entidaes asociatives agraries y ganaderíes de lleche
    • El Principáu reclama al Executivu central que'l Plan Nacional Integráu d'Enerxía y Clima recueya les singularidaes del texíu económicu y social de la comunidá
    • L'Alministración solicita a la Comisión Nacional de los Mercaos y la Competencia que condicione la compra de Air Europa por Iberia a la concurrencia d'un segundu operador independiente na ruta aérea a Madrid

    El Gobiernu d'Asturies aprobó güei un gastu plurianual de 84.141.500 euros destináu a les ayudes de la Política Agrícola Común (PAC), que van beneficiar a más de diez mil ganaderos y llabradores.

    Per una parte, 64 millones van dedicase a la llinia de sofitu a les rentes de los profesionales, financiada dafechu pol Fondu Européu Agrícola de Garantía Agraria (Feaga). Trátase de los pagos directos a l'agricultura y la ganadería, que s'estremen en dos grandes bloques: les ayudes ensin vincular a la producción (pagos básicu y verde, y ayuda a la incorporación de xente mozo al campu) y aquelles que sí tán rellacionaes cola producción. Estes postreres beneficien na so mayoría a esplotaciones que caltienen vaques nodrices, de vacunu de cebu, vacunu de lleche, ovín y caprín.

    La segunda llinia, financiada conxuntamente pol Principáu, el Ministeriu d'Agricultura, Pesca y Alimentación, y el Fondu Européu Agrariu de Desenvolvimientu Rural (Feader), ta rellacionada col Programa de Desenvolvimientu Rural. En concreto, consiste nos pagos pa sofitar l'actividá agraria sostenible vinculada a les midíes de agroambiente y clima, la producción ecolóxica, les ayudes enmarcaes nel programa Natura-2000 y les compensaciones a la producción en zones de monte y con llimitaciones naturales específiques.



    1.320.500 euros para'l sector agroganadero

    L'Executivu autorizó una partida de 1.320.500 euros destinada a financiar la convocatoria de subvenciones a entidaes asociatives agraries pa la meyora de les esplotaciones y la dotación de servicios d'asesoramientu y participación en rexímenes de certificación de ganaderíes de lleche.

    La convocatoria pa la meyora de les esplotaciones va cuntar con 945.500 euros distribuyíos en dos anualidaes: 600.000 anguaño y 345.500 el próximu. Estes subvenciones, que pueden algamar un máximu de 500.000 euros por solicitante, sirven d'estímulu al sector primariu y favorecen la revalorización de les producciones, de la que contribuyen al fortalecimientu del mediu rural.

    Otra partida de 375.000 euros destínase a subvenciones pa servicios d'asesoramientu y participación en rexímenes de certificación d'esplotaciones de lleche. Esta midida busca sofitar los controles que realicen les empreses o cooperatives de tresformación láctea mientres tol procesu de manipulación de la lleche hasta llegar al consumidor, cola mira de garantizar la calidá del productu. Los análisis llévense a cabu dende'l principiu de la cadena, por aciu la revisión de los tanques de fríu y los equipos pa catar, les cisternes de tresporte y el control de xermes.

    Estes ayudes tamién tán enfocaes a la meyora de la eficiencia enerxética, con midíes como la renovación de los equipos de fríu, los tanques de lleche o los equipos de catar p'aforrar enerxía. L'añu pasáu beneficiáronse d'estos sofitos económicos dos empreses y dos cooperatives, con un total de 304.000 euros.



    320.300 euros pa los Grupos d'Acción Local de Pesca

    L'Executivu va subvencionar con 320.300 euros estratexes d'acción local participativa de los Grupos d'Acción Local de Pesca, nel marcu del Fondu Européu y Marítimu de Pesca (FEMP). Trátase d'una convocatoria plurianual que se distribuye en dos exercicios: 130.494 euros anguaño y 189.805, en 2021.

    La distribución de los fondos por anualidaes ye esta:

    Grupos d’acción local 2020 2021 Total
    Centro para el Desarrollo de la Comarca Oscos-Eo 28.064,63 23.303,25 51.367,88
    Asociación Centro de Desarrollo Navia-Porcía 70.589,50 70.589,50 141.179,00
    Centro para el Desarrollo del Valle del Ese-Entrecabos 22.840,60 28.479,63 51.320,23
    Asociación para el Desarrollo Integrado del Centro de Asturias Periurbano 9.000,00 15.000,00 24.000,00
    Asociación para el Desarrollo Rural Integral Comarca de la Sidra --- 52.433,00 52.433,00
    TOTAL 130.494,73 189.805,38 320.300,11

     



    Observaciones al Plan Nacional Integráu d'Enerxía y Clima

    El Conseyu de Gobiernu aprobó más de 50 observaciones al estudiu ambiental estratéxicu del borrador del Plan Nacional Integráu d'Enerxía y Clima (PNIEC) 2021-2030, que van unviase al Ministeriu pa la Transición Ecolóxica y el Retu Demográficu, y nes que l'Executivu autonómicu reclama al Gobiernu d'España que'l documentu recueya les singularidaes del texíu económicu y social d'Asturies.

    Esti plan, que'l so conteníu foi adelantáu a la Comisión Europea pol Gobiernu d'España esta selmana, pretende menguar, pelo menos, un 23 % les emisiones de gases d'efectu invernaderu en 2030 al respective de 1990, algamar un 42 % d'anovables sobre l'usu final de la enerxía, un 39,5 % de meyora de la eficiencia enerxética y el 74 % d'anovables na xeneración eléctrica.

    El Principáu comparte los oxetivos del PNIEC, pero insiste na necesidá d'un tratamientu estremáu p'Asturies poles particularidaes del so mix de xeneración y consumu y la vulnerabilidá del so sistema enerxéticu y industrial, bien intensivu n'emisiones. Por esa razón, el Gobiernu d'Asturies solicita al ministeriu un análisis más detalláu de los efectos sobre la seguridá y calidá del suministru eléctricu y enerxéticu y sobre la futura planificación enerxética y d'infraestructures eléctriques. Asina, propón estudiar les consecuencies que l'amenorgamientu d'actividá de les centrales térmiques va tener en zones industriales, como la exa Avilés-Xixón, cola mira de proponer midíes correctores complementaries a les incluyíes nel estudiu ambiental sometíu a consulta.

    Asina mesmo, considera necesario evaluar los sistemes d'almacenamientu y xestión de la demanda del gas natural, teniendo en cuenta toles instalaciones yá construyíes, incluyida la planta d'El Musel (la regasificadora), que s'atopa na última fase pa llograr autorización alministrativa.

    L'Executivu autonómicu apuesta por midíes más eficaces de sofitu a la industria pol riesgu de deslocalización que xenera la perda de competitividá en mercaos globales non afectaos pol costu de les emisiones. Nesti sentíu, propón la creación d'un fondu nacional pa la compensación de costos indirectos del dióxidu de carbonu.

    Ente les observaciones que se planteguen figuren midíes específiques p'aprovechar infraestructures enerxétiques que cesen la so actividá (pozos mineros pal almacenamientu d'enerxía, valorización de los residuos d'escombreres y vertideros de cenices de centrales térmiques, aprovechamientu de gases residuales de la industria, etcétera), asina como más midíes de sofitu económicu pal tresformamientu de sectores como'l residencial, la industria o'l sector agrario y forestal, y pa la investigación n'árees rellacionaes colos materiales sostenibles, la enerxía y el tresporte, ente más otros. Tamién se propón estudiar la llende d'endeldamientu que tienen les alministraciones públiques pa impulsar les inversiones que tienen d'acometer cola mira d'amenorgar consumos enerxéticos.

    Otra manera, el Gobiernu d'Asturies encamienta a que s'analice l'impactu que tienen sobre la salú la perda d'empléu de calidá, les repitíes reestructuraciones y reconversiones a les que se vieron sometíos los sectores mineru y industrial y la esraizadura familiar por tresllaos forzosos motivaos pol zarru d'instalaciones.



    Conexones aérees con Madrid

    L'Executivu tamién analizó la situación de les conexones aérees. El Principáu va solicitar a la Comisión Nacional de los Mercaos y la Competencia (CNMC) que l'aeropuertu de Santiagu’l Monte cunte con un segundu operador independiente d'Iberia na ruta Asturies-Madrid, nel casu de que se consume la compra d’Air Europa, perteneciente a Globalia, por Internacional Airlines Group (IAG). El Conseyu de Gobiernu tomó esta decisión cola mira d'evitar el monopoliu de la conectividá aérea na principal ruta directa de la comunidá.

    La Conseyería d'Infraestructures, Mediu Ambiente y Cambéu Climáticu va treslladar a les autoridaes de competencia esti alcuerdu, que tamién incluye'l pidimientu espresu de caltener nesta ruta'l númberu de frecuencies diaries y l'equilibriu nel so repartu, en númberu y horariu, ente los dos operadores independientes. Amás, el Principáu rique a la CNMC el mesmu númberu de places diaries y el repartu equilibráu ente operadores nes ratios actuales, cola mira d'asegurar la competitividá pa evitar l'alza de precios y una llimitación d'horarios.

    El Conseyu de Gobiernu tomó la decisión de solicitar a la CNMC que condicione la compra d’Air Europa por Iberia porque'l monopoliu diba repercutir na conectividá aérea rexonal, yá que de producise l'alquisición, el 81,6 % del tráficu de pasaxeros, con orixe o destín Asturies, dependería puramente d’IAG, d’alcuerdu colos datos d'usuarios de 2019.



    Midíes pa trabayadores afectaos por amiantu

    L'Executivu aprobó la reedición del conveniu ente l'Institutu Nacional de la Seguridá Social (INSS) y la Conseyería de Salú p'atender y sofitar a trabayadores afectaos por patoloxíes derivaes de la esposición llaboral del amiantu.

    Esti alcuerdu, que nun implica compromisu económicu, va dexar valorar, con tolos elementos de xuiciu necesarios, una posible situación d'incapacidá temporal o permanente d'aquelles persones que tuvieron contactu col amiantu pola so ocupación llaboral.

    Tola información atropada sobre estos trabayadores pola Conseyería de Salú va tar centralizada na Dirección Xeneral de Salú Pública, dende onde va unviase al Institutu Nacional de la Seguridá Social con cuenta de que pueda empecipiar el procedimientu pa evaluar la situación d'incapacidá y determinación de continxencia.



    Ver en formatu orixinal (PDF : 262 Kb )

Buscar mas acuerdos

Buscar
Desde
/
/
Hasta
/
/

Información sobre el documento

© Copyright 2006. Gobiernu del Principau d'Asturies