Gobierno del Principado de Asturias

Asturias, mucho más cerca

Estás en

Aniciu Gobiernu Acuerdos del Conseyu de Gobiernu
 

Acuerdos del Conseyu de Gobiernu

  1. agosto
  2. 14 de agosto de 2019
    Alcuerdos del Conseyu de Gobiernu: 14/08/2019

    El Conseyu de Gobiernu concede la Medaya d'Oru d'Asturies a Vicente Álvarez Areces, a títulu póstumu, y a la Brigada Central de Salvamentu Mineru
       - La presidenta del Centru Syperior d'Investigaciones Científiques, Rosa Menéndez; la escultora María Jesús Rodríguez y la Rede de Cases d'Acoyida reciben les distinciones de plata
       - Los actos de celebración del Día d'Asturies van tener llugar esti añu nel conceyu de Cabrales
       - L'Executivu noma secretariu xeneral técnicu de la Conseyería d'Infraestructures, Mediu Ambiente y Cambéu Climáticu a Francisco Javier Álvarez

    El Conseyu de Gobiernu alcordó güei conceder esti añu cinco Medayes d'Asturies: dos na so categoría d'oru a Vicente Álvarez Areces –a títulu póstumu- y a la Brigada Central de Salvamentu Mineru, y el restu, de plata, a la presidenta del Centru Superior d'Investigaciones Científiques (CSIC), Rosa Menéndez, a la escultora María Jesús Rodríguez, y a la Rede de Cases d'Acoyida del Principáu.

    La Medaya d'Asturies acútase, según la Llei Reguladora d'Honores y Distinciones del Principáu, pa premiar méritos verdaderamente singulares que se dan en persones o instituciones d’importancia y trescendencia pa los intereses xenerales de la comunidá autónoma que los fai acreedores d'esta reconocencia pública.

    Lo que sigue ye una curtia reseña de les persones ya instituciones distinguíes.

    Vicente Alberto Álvarez Areces
       - La concesión de la Medaya d'Oru a Vicente Alberto Álvarez Areces, fináu'l pasáu 17 de xineru, reconoz “el so compromisu cola llibertá y la democracia, la so impecable trayectoria política y la so fundamental aportación pal desenvolvimientu y la modernización d'Asturies”.
       - Nacíu en Xixón el 4 d'agostu de 1943, llicenciáu en Matemátiques y peritu industrial, na so mocedá compaxinó la docencia cola política y participó viviegamente en distintos movimientos estudiantiles. Venceyáu primeramente al Partíu Comunista d'España (PCE), abandonó la formación en 1978 y darréu xunióse al PSOE, al que consagró la mayor parte de la so trayectoria política.
       - Foi escoyíu alcalde de Xixón nos comicios de 1987, 1991 y 1995 y nos sos doe años de mandatu propúnxose modernizar la ciudá, abrila al mar cola creación de les playes de Poniente y L’Arbeyal, impulsar el so desenvolvimientu urbanísticu, fomentar l'actividá cultural, recuperar l'antiguu puertu y reformar numberosos enclaves como'l cuetu de Santa Catalina, los parques del Rinconín y La Providencia o la sienda del Cervigón.
       - Tres la so etapa municipal, el 20 de xunetu de 1999 foi investíu presidente del Principáu, cargu qu'ocupó hasta 2011. Nes sos trés llexislatures la comunidá recibió'l trespasu de les competencies n'árees tan relevantes como Educación, Sanidá y Xusticia. Amás, abordáronse proyectos d'importancia estratéxica, como'l desenvolvimientu de los campus d'Uviéu, Xixón y Mieres; la construcción del nuevu Hospital Universitariu Central d'Asturies (Huca), n'Uviéu, y del Vital Álvarez Buylla, en Mieres; l'ampliación del Muséu del Belles Artes y del puertu d'El Musel, la creación del Centru Niemeyer n'Avilés y la puesta en marcha de Llaboral Ciudá de la Cultura en Xixón. Cola so presidencia inauguráronse tamién el Muséu del Xurásicu (Colunga), el centru d'interpretación de Tito Bustillo (Ribeseya) y el Parador de Courias (Cangas), ente otros equipamientos.
       - Políticu con una enorme capacidá de trabayu, Álvarez Areces favoreció'l progresu de Xixón como alcalde y d'Asturies dende la Presidencia de la comunidá. Foi, amás, un exemplu d'entrega y serviciu públicu p'avanzar escontra una sociedá más xusta y solidaria, valores qu'exerció tamién como senador hasta'l so fallecimientu.
    Brigada Central de Salvamentu Mineru

    La Brigada Central de Salvamentu Mineru foi distinguida cola Medaya d'Oru d'Asturies en reconocimientu a les sos más de cien años de trayectoria como cuerpu d'élite n'operaciones de localización y rescate n'espacios confinaos y “a la so participación n'operativos nacionales ya internacionales en situaciones de peligru, principalmente en quemes, ambientes tóxicos y esplosivos”.

    Constituyida fai más d'un sieglu como cuerpu profesional de salvamentu pa dar serviciu a les empreses mineres, la so esperiencia en rescates n'interior motivó la so participación en numberoses intervenciones n'accidentes y catástrofes naturales.

    Anguaño, l'Asociación de Salvamentu en Mines, de la que forma parte la brigada, ta integrada pol Principáu, Orovalle, Grupu Minersa, Carbonar y el Grupu Hunosa, qu'apurre'l 90% del so presupuestu añal. L'equipu, que tien la so base nel pozu Fondón de Llangréu, ta compuestu por 18 persones: un director técnicu, un xefe de brigada, un inxenieru técnicu, un vixilante, trés conductores-salvadores y once brigadistes procedentes de los pozos d'Hunosa y con un mínimu de diez años d'esperiencia en mines.

    El grupu ta especializáu en técniques de rescate n'espacios confinaos colos medios habituales utilizaos en minería, especialmente nel usu del equipu de respiración autónoma en circuitu zarráu. Anque'l so llabor como brigada de rescate centróse n'innumberables accidentes mineros, el prestíu del equipu llevólu a intervenir n'emerxencies tanto n'Asturies como n'otres comunidaes y nel estranxeru. La so actuación más recién, y la que volvió poner en valor la so profesionalidá, producióse en xineru, cuando foi riquida pa participar nel operativu de rescate del neñu Julen Roselló en Málaga.

    Ente otros reconocimientos, la brigada recibió la Medaya d'Oru al Méritu nel Trabayu (1972), la Medaya de Plata del Principáu (1990), la Medaya de Plata de la Cruz Roja (2005), la Medaya d'Oru con distintivu azul al Méritu de la Protección Civil (2007) y la Medaya d'Oru d'Andalucía (2019).

    Rosa Menéndez López

    El Conseyu de Gobiernu alcordó conceder la Medaya d'Asturies, na so categoría de plata, a Rosa María Menéndez López, “pola so exemplar trayectoria, pol eleváu nivel qu'algamó en toles facetes venceyaes al so oficiu de química y por ser la primer muyer que lidera'l mayor ente d'investigación d'España”.

    Nacida en Cuideiru en 1956, Menéndez ye doctora en Química pola Universidá d'Uviéu y presidenta del Conseyu Superior d'Investigaciones Científiques (CSIC) dende payares de 2017. Ye la primer muyer qu'ocupa la presidencia d'esti organismu nos sos 80 años d'historia. Dende 2003 hasta 2008 dirixió l'Institutu Nacional del Carbón (Incar), onde s'especializó nos materiales de carbonu y nos procesos de conversión del carbón y los sos derivaos, y nos últimos años abrió una llinia d'investigación sobre'l grafenu con aplicaciones na biomedicina y nel almacenamientu d'enerxía.

    A lo llargo de la so trayectoria realizó investigaciones na School of Enviromental and Mining Engineering (Reinu Uníu), nos departamentos d'Inxeniería Química del Imperial Collegue (Reinu Uníu) y de la Clemson University (Estaos Xuníos), nel departamentu de Xeoloxía de la Southern Illinois University (Estaos Xuníos) y nos llaboratorios Northern Carbon Research (Reinu Uníu). Otramiente, participó en más de 30 proyectos d'investigación a nivel autonómicu, nacional y européu; publicó más de 200 artículos en revistes internacionales d'altu impactu y cuenta con una decena de patentes.

    Ente otros cargos, foi presidenta de la European Carbon Association y del Grupu Español del Carbón, coordinadora del Programa de Materiales y Enerxía, miembru del Comité Internacional del Carbón y Petroloxía Orgánica, de la Comisión Nacional d'Evaluación de l'Actividá Investigadora y del conseyu rector de l'Axencia Nacional d'Investigación.

    María Jesús Rodríguez López

    L'Executivu estrema a María Jesús Rodríguez cola Medaya d'Asturies, na so categoría de plata, pol so singular y brillosu llabor artísticu y “pol talentu y la fuerza qu'entornó nuna obra que dialoga cola so esperiencia vital, siempre amestada a la creación dende l'interés intelectual”.

    Rodríguez (Uviéu, 1959) realizó una apuesta constante pola esperimentación, por aciu l'usu d'elementos de la naturaleza y de materiales industriales actuales, principalmente cayuela y cartón, como base pa representar un universu conceptual de gran riqueza espresiva dende una astracción personal. Artista de los sentíos y l'esperiencia, considera los elementos naturales “capes d'historia y de memoria”, con que los sos volumes xuega “pa intentar detener la mirada de la xente”.

    La escultora formó parte del Grupu Abra, colectivu artísticu que marcó un finxu nes artes plástiques d'Asturies nos años 80 del pasáu sieglu. Formada na Escuela d'Artes Aplicaes d'Uviéu, dedicóse nos entamos de la so actividá creativa a la pintura, pa dir evolucionando pasu ente pasu escontra la escultura, na que desenvolvió'l so trabayu más esencial, pol que ta considerada un esponente de la cultura actual.

    Los sos trabayos, que fueron reconocíos a nivel rexonal, nacional ya internacional, espunxéronse n'Asturies, n'otros llugares d'España y en galeríes de París, Zúrich, Lyon, Münster o Nueva York. Amás, tien obra pública n'Uviéu, Xixón, Avilés y A Veiga, y les sos creaciones esibiéronse na Feria FIAC de París y n'Arcu, en Madrid.

    Rede de Cases d'Acoyida del Principáu

    La Rede de Cases d'Acoyida del Principáu recibe la Medaya d'Asturies, na so categoría de plata, como tributu “al so llabor p'apurrir una atención urxente y permanente a les víctimes de violencia de xéneru y a les persones al so cargu”, col propósitu de favorecer la so recuperación integral y facilitar el so regresu a una vida autónoma.

    La so constitución arrincó nel añu 2000 cola redacción d'un conveniu marcu que sentó les bases pa l'atención a muyeres maltrataes y menores. La xestión encamentada a Cruz Roja y en 2002 yá se xuntaren los conceyos d'Uviéu, Xixón, Avilés y Valdés, darréu fuéron incorporándose Castrillón, Llangréu, Llaviana y Samartín del Rei Aurelio. El 25 de marzu de 2007 punxósae en marcha'l Centru d'Atención Integral a Muyeres Víctimes de la Violencia de Xéneru, conocíu popularmente como Casa Malva, un equipamientu especializáu n'atención integral que se convirtió en cabecera de la rede.

    Anguaño, nel Principáu funcionen trés cases d'acoyida y 20 pisos tutelaos pa un total de 80 unidaes familiares. L'oxetivu d'estos recursos ye favorecer la recuperación total de les víctimes de maltratu y la so atención ye altamente valorada: el 95% de les muyeres axudica la máxima puntuación l'asistencia recibida.

    L'accesu a la rede realiízase por aciu una llamada al teléfonu d'emerxencies 112 o al traviés de les fuerces y cuerpos de seguridá, los servicios sociales, el sistema sanitariu, los centros asesores de la muyer y l'Institutu Asturianu de la Muyer. En 2018, emprestóse asistencia a 467 persones: 243 muyeres, 213 fíes y fíos y 11 persones a cargu.



    Celebración del Día d'Asturies en Cabrales

    El Conseyu de Gobiernu tamién decidió que los actos del Día d'Asturies se celebren esti añu nel conceyu de Cabrales.



    Nuevu secretariu xeneral técnicu

    L'Executivu nomó güei secretariu xeneral técnicu de la Conseyería d'Infraestructures, Mediu Ambiente y Cambéu Climáticu a Francisco Javier Álvarez López (Uviéu, 1976). Llicenciáu en Derechu pola Universidá d'Uviéu, ye funcionariu de carrera del Cuerpu Superior d'Alministradores del Principáu. Dende 2011 ocupaba la xefatura del Serviciu d'Asuntos Xenerales de la Conseyería de Desenvolvimientu Rural y Recursos Naturales y primeramente foi técnicu del mesmu serviciu na Conseyería de Mediu Rural y Pesca.

    D'esta miente, rematen los nomamientos de les persones que van ocupar les secretaríes xenerales técniques de toles conseyeríes, un pasu que va permitir avanzar na configuración de la nueva estructura de l'Alministración autonómica.

     

  3. 8 de agosto de 2019
    Alcuerdos del Conseyu de Gobiernu: 08/08/2019

       - El Gobiernu d'Asturies avanza na definición de la so nueva estructura col nomamientu de les secretaríes xenerales técniques
       - Esti pasu va permitir trabayar na ordenación de les xeres y funciones de los distintos departamentos del Executivu

    El Gobiernu d'Asturies aprobó güei el nomamientu de les persones que van ocupar les secretaríes xenerales técniques de nueve conseyeríes. Esti pasu supón una meyora para perfilar los distintos departamentos del Executivu autonómicu ya impulsar los correspondientes decretos.

    La estructura de l'Alministración constitúi l’entramáu organizativu que permite dar cumplimientu al programa de gobiernu. El primer trámite que se llevó a cabu nesti sentíu na actual llexislatura foi la publicación del decretu del presidente 13/2019, de 24 de xunetu, pol que se definen les nueves conseyeríes y les sos competencies particulares.

    La elección de les persones que van ocupar les secretaríes xenerales técniques va dexar dir afondando na configuración de les estructures de los distintos departamentos, que se va completar a lo llargo de les próximes selmanes. Una vegada cerrada la estructura, van facese los nomamientos correspondientes.

    Los nomamientos aprobaos son los siguientes:

    El Gobiernu d'Asturies aprobó güei el nomamientu de les persones que van ocupar les secretaríes xenerales técniques de nueve conseyeríes. Esti pasu supon una meyora para perfilar los distintos departamentos del Executivu autonómicu ya impulsar los correspondientes decretos.

    La estructura de l'Alministración constitúi el treme organizativo que dexa dar cumplimientu al programa de gobiernu. El primer trámite que se llevó a cabu nesti sentíu na actual llexislatura foi la publicación del decretu del presidente 13/2019, de 24 de xunetu, pol que se definen les nueves conseyeríes y les sos competencies particulares.

    La elección de les persones que van ocupar les secretaríes xenerales técniques va dexar dir afondando na configuración de les estructures de los distintos departamentos, que se va completar a lo llargo de les próximes selmanes. Una vegada cerrada la estructura, va dar en los nomamientos correspondientes.

    Los nomamientos aprobaos son los siguientes:

    - Conseyería de Presidencia: María del Mar Martínez Salmerón (Almería, 1960). Llicenciada en Derechu pola Universidá de Granada, ingresó nel Cuerpu Superior d'Alministradores del Principáu en 1990. De magar, foi xefa de sección de Contratación y Espropiaciones, xefa de serviciu d'Entamadores, lletrada del Serviciu Xurídicu, xefa de serviciu de Turismu y xefa de serviciu d'Estratexa Comercial y Turística na Conseyería d'Industria, Empléu y Turismu.

    - Conseyería de Facienda: Juan Antonio Baragaño (Llangréu, 1963). Ye llicenciáu en Derechu pola Universidá d'Uviéu y funcionariu del Cuerpu Superior d'Alministradores del Principáu dende 1990. Desempeñó diversos cargos de responsabilidá na estructura del Principáu y tuvo al mandu de distintes secciones y servicios dende 1991. Dende 2012 hasta agora foi'l xefe del serviciu d'Asesoramientu Xurídicu de la Conseyería de Facienda y Sector Públicu.

    - Conseyería d'Industria, Empléu y Promoción Económica: Luis Carmelo Ménguez Vicente (Ponferrada, 1963). Ye llicenciáu en Derechu pola Universidá de Cantabria y empezó la so carrera profesional en 1992 como funcionariu del Cuerpu Superior d'Alministradores del Principáu. Ente otros cargos, foi técnicu de la Dirección Xeneral de Pesca, asesor xurídicu del Secretariáu de Gobiernu, xefe del serviciu d'Asuntos Xenerales de les conseyeríes d'Industria y Cultura, xefe de la Inspección Xeneral de Servicios y coordinador de normativa educativa.

    - Conseyería d'Educación: Begoña Fernández Suárez (Xixón, 1964). Llicenciada en Derechu pola Universidá d'Uviéu, foi directora xeneral de Patrimoniu dende 2012. Dende'l so ingresu como funcionaria de carrera del Cuerpu Superior d'Alministradores foi secretaria técnica de les Conseyeríes de Mediu Ambiente y Urbanismu y d'Educación, xefa de sección de Personal Llaboral de la Dirección Xeneral de Función Pública, xefa de serviciu de Réxime Xurídicu de la Conseyería de Mediu Ambiente y Urbanismu, xefa de serviciu d'Ordenación de Recursos Humanos y directora xeneral de Función Pública. Tamién foi xefa del serviciu de Promoción Turística y directora del Institutu d'Alministración Pública Adolfo Posada.

    - Conseyería de Salú: Eulalia Fernández Méndez (Les Regueres, 1983). Llicenciada en Derechu pola Universidá d'Uviéu, máster en Protección Xurídica de les Persones y Grupos Vulnerables y máster en Contratación Pública. Dende 2018 ye la secretaria xeneral técnica de la Conseyería de Sanidá, onde ingresó va ocho años como funcionaria de carrera del Cuerpu Superior d'Alministradores. Nesti departamentu desempeñó distintes funciones nos servicios xurídicos de l'Axencia de Sanidá Ambiental y Consumu y nes secciones de Contratación y de Sofitu Alministrativu.

    - Conseyería de Derechos Sociales y Bienestar: Gloria Gadea Badal Ortiz (Uviéu, 1977). Llicenciada en Derechu pola Universidá d'Uviéu, empezó la so andadura profesional nel Institutu Nacional de les Alministraciones Públiques. Foi secretaria interventora nos conceyos de Ponga y Crémenes (Castiella y Llión). En 2008 ingresó como interventora xeneral nel Conceyu de Cuideiru y darréu asumió'l cargu de secretaria interventora na agrupación de conceyos de San Martín d'Ozcos y Santalla d'Ozcos. De 2008 a 2012 trabayó como asesora xurídica na Axencia Asturiana d'Emigración y anguaño ye técnica d'auditoría de la Sindicatura de Cuentes del Principáu.

    - Conseyería de Desenvolvimientu Rural, Agroganadería y Pesca: José Manuel Senén Casal Iglesias (Uviéu, 1957). Llicenciáu en Ciencies Económiques y Empresariales pola Universidá de Valencia, foi secretariu xeneral técnicu de la Conseyería de Desenvolvimientu Rural y Recursos Naturales dende agostu de 2015. En 1984 ingresó nel Cuerpu Superior d'Alministradores, onde ocupó delles xefatures de serviciu na Dirección Xeneral de Función Pública hasta 1991. Darréu, tuvo cargos directivos nel Conceyu de Xixón; ente ellos, el de director xeneral de Servicios. Tamién foi xefe de gabinete de la Presidencia de la Xunta Xeneral del Principáu.

    - Conseyería de Cultura, Política Llingüística y Turismu: Andrea Suárez Rodríguez (Xixón, 1979). Llicenciada en Derechu pola Universidá d'Uviéu, trabayó nel Institutu de Desenvolvimientu Económicu del Principáu (Idepa) y nes conseyeríes d'Industria, Empléu y Turismu y d'Educación y Ciencia. Dende 2011, ocupaba la xefatura de serviciu d'Asuntos Xenerales na Secretaría Xeneral del Serviciu de Salú del Principáu d'Asturies (Sespa).

    - Conseyería de Ciencia, Innovación y Universidá: Beatriz Alejos Bermúdez (Taramundi, 1979). Llicenciada en Derechu pola Universidá d'Uviéu, en 2009 ingresó como funcionaria de carrera del Cuerpu Superior d'Alministradores. Foi xefa de sección de Rexistru y Arquivu de Personal na Dirección Xeneral de Función Pública y coordinadora de Promoción na Dirección Xeneral de Turismu. Dende 2011 ocupa la xefatura de serviciu de Relaciones coles Entidaes Locales na Dirección Xeneral d'Alministración Local.

     

  4. 1 de agosto de 2019
    Alcuerdos del Conseyu de Gobiernu: 01/08/2019

    El Gobiernu d’Asturies apoya con 895.000 euros la integración nel mercáu llaboral de 710 persones con discapacidá severa
       - Les subvenciones, empobinaes a empreses y centros especiales d’empléu, disponen de financiación del Fondu Social Européu y cubren parte de los costos salariales de los trabayadores
       - El Principáu recibe 304.000 euros del Executivu central pa impulsar cinco programes contra les drogodependencies

    El Gobiernu d’Asturies aprobó güei un gastu de 895.000 euros pa la convocatoria d’una llinia de subvenciones destinada a sofitar la integración nel mercáu llaboral de 710 persones con discapacidá severa.

    Estes ayudes, dirixíes a empreses y centros especiales d’empléu, tramítense en réxime de concurrencia competitiva, cubren parte de los costos salariales de los trabayadores y cunten con financiamientu del Programa Operativu Fondu Social Européu (FSE), qu’apurre’l 80 % de los recursos (716.000 euros), y del Principáu, qu’abona’l 20 % restante (179.000).

    La Estratexa Europea sobre Discapacidá 2010-2020 configura’l marcu d’actuación de la Unión Europea nesti ámbitu y sofita los esfuercios de los Estaos miembros pa incorporar al mercáu de trabayu a persones discapacitaes y con dificultaes especiales d’inxertamientu.

    La convocatoria d’ayudes va articulase al traviés de trés llinies empobinaes a estes entidaes:

       - Centros especiales d’empléu constituyíos como empreses: 500.000 euros.
       - Centros especiales d’empléu formaos por entidaes ensin ánimu d’arriquecimientu: 166.000 euros.
       - Empreses mercantiles: 229.000 euros.
       - Por cada emplegáu discapacitáu va abonase mensualmente una ayuda del 10 % del salariu mínimu interprofesional (SMI) vixente nel periodu que cubre la subvención, que va del 10 de xunetu del 2018 al 30 de xunu d’anguaño. Estes ayudes son complementaries a les que se conceden anualmente a persones con discapacidá contrataes en centros especiales d’emplegu.

    Alcuerdu cola Delegación del Gobiernu pal Plan sobre Droga

       - L’Executivu autorizó la celebración d’un conveniu col Ministeriu del Interior, al traviés de la Delegación del Gobiernu pal Plan Nacional sobre droga, que va facilitar la llucha contra les drogodependencies a lo llargo d’anguaño.
       - En virtú del alcuerdu, el Principáu va recibir 304.000 euros con cargu a los presupuestos xenerales del Estáu del 2019, al traviés de creitos que provienen del fondu de bienes prindaos por tráficu de droga y otros delitos rellacionaos. Esta partida va dexar desenvolver cinco programes:
       - Tratamientu pa l’adicción a la cocaína y otros psicoestimulantes: 120.000 euros.
       - Programa d’atención a persones con drogodependencia nos xulgaos de lo penal d’Asturies: 37.000 euros.
       - Programa d’intervención sobre l’alcoholismu: 90.000 euros.
       - Programa de pisos d’incorporación social: 50.000 euros.
       - Programa Indro, d’información sobre droga: 7.000 euros.

    Collaboración cola Universidá Camilo José Cela

    La Conseyería de Sanidá y la Universidá Camilo José Cela de Madrid van prorrogar hasta ochobre del 2020 el conveniu pal desenvolvimientu de programes de cooperación educativa que caltienen dende’l 2018.

    Esti alcuerdu fai posible qu’estudiantes asturianos del grau d’Enfermería de la institución académica madrilana realicen práctiques profesionales tutelaes en centros sanitarios del Serviciu de Salú del Principáu (Sespa). D’esta manera, van tener la posibilidá de conocer el sistema sanitariu de la so comunidá y amenorgar costos por desplazamientos.

     

Buscar mas acuerdos

Buscar
Desde
/
/
Hasta
/
/

Información sobre el documento

© Copyright 2006. Gobierno del Principado de Asturias