Gobierno del Principado de Asturias

Asturias, mucho más cerca

Estás en

Aniciu Gobiernu Acuerdos del Conseyu de Gobiernu
 

Acuerdos del Conseyu de Gobiernu

  1. junio
  2. 4 de junio de 2020
    Alcuerdos del Conseyu de Gobiernu: 04/06/2020
    • La mayor partida, de 800.000 euros, va dar continuidá a les iniciatives de prevención y salú pública qu'impulsen conceyos y mancomunidaes
    • Otros 110.000 euros dedíquense al espardimientu de los derechos de los usuarios
    • L'Executivu concede una subvención de 62.752 euros a la Fundación Solidaridá Amaranta pa l'atención residencial a muyeres víctimes d'esplotación sexual y trata

    El Gobiernu d'Asturies aprobó güei una partida de910.000 euros destinada a la concesión de subvenciones a entidaes locales pa la execución de programes municipales contra les drogues y el desenvolvimientu d'acciones de protección de los derechos de consumidores y usuarios.

    Los fondos, xestionaos pola Conseyería de Salú, divídense en dos llinies: 800.000 euros pa planes de prevención y promoción de vezos saludables y 110.000 pa espublizar los derechos de los consumidores.

    La partida autorizada facilita'l caltenimientu de los programes que los conceyos desenvuelven nestos dos ámbitos.

    L'añu pasáu, 39 conceyos y cuatro mancomunidaes beneficiáronse de la convocatoria rexonal pa los programes contra la drogadicción, que movilizó 770.860 euros n'ayudes. La mayoría d'estes iniciatives tien calter comunitariu ya implica al texíu social.

    Estes actividaes ayuden tamién a xenerar empleos directos, principalmente n'organizaciones non gubernamentales, asociaciones ensin ánimu d'arriquecimientu y empreses del tercer sector, amás de puestos de trabayu nos conceyos que xestionen estos planes.

    Per otra parte, impúlsense les acciones municipales empobinaes a la formación de la ciudadanía pa que conoza los sos derechos en relación col consumu y los exerzan de manera crítica y responsable, lo qu'inclúi, ente otres, actividaes d'asesoramientu ya información, campañes de publicidá, edición de folletos o actuaciones d'inspección en materia de control y seguridá de productos.



    Sofitu a les víctimes d'esplotación sexual

    El Conseyu de Gobiernu alcordó conceder una subvención de 62.752 euros a la Fundación Solidaridá Amaranta pa l'atención residencial d'emerxencia a víctimes d'esplotación sexual y trata nel contestu del estáu d'alarma.

    Estos fondos van facilitar la puesta en marcha de dos nuevos agospiamientos en Xixón y la financiación de los gastos de personal, caltenimientu y xestión alministrativa. La midida compleméntase con acciones de sofitu socioeducativu y atención sociosanitaria y psicosocial a les víctimes por un períodu d'ocho meses y mediu, mientres se normaliza la situación social provocada pola pandemia de la COVID- 19.

    El confinamientu deriváu de la emerxencia sanitaria supón un riesgu adicional pa les víctimes de trata y esplotación sexual, ante l'amenorgamientu de los sos ingresos y l'imposibilidá de caltenese nos agospiamientos habituales por falta de dineru. Por esta razón, el Principáu considera necesariu aumentar el númberu de places destinaes a esti colectivu, un serviciu qu'empresta davezu la fundación Amaranta y que nestos momentos s’atopa na llende de la so capacidá.



    Cese de la interventora xeneral

    L'Executivu aprobó güei el cese a pidimientu propiu de la interventora xeneral, Ana Masa Timón. L'Executivu estima los servicios emprestaos por Masa dende'l so nomamientu, el 13 de setiembre de 2019.



    Ver en formatu orixinal (PDF : 111 Kb )

Buscar mas acuerdos

Buscar
Desde
/
/
Hasta
/
/

Información sobre el documento

© Copyright 2006. Gobierno del Principado de Asturias