Gobierno del Principado de Asturias

Asturias, mucho más cerca

Estás en

Aniciu Gobiernu Alcuerdos del Conseyu de Gobiernu: 03/10/2019
 

Alcuerdos del Conseyu de Gobiernu: 03/10/2019

  1. 4 de octubre de 2019
    Alcuerdos del Conseyu de Gobiernu: 03/10/2019
    El Gobiernu d'Asturies abre'l diálogu pa llograr un alcuerdu de concertación que facilite'l desenvolvimientu económicu, l'empléu y la modernización empresarial
    • El presidente, el vicepresidente y el conseyeru d'Industria celebren esta tarde la primer xunta colos líderes de Fade, UXT y CC. OO.
    • Adrián Barbón va empecipiar el 15 d'ochobre les negociaciones colos grupos parllamentarios pa consensuar un planteamientu común na reforma del financiamientu autonómicu
    • Aprobáu un gastu de mediu millón pa sofitar la creación de grupos operativos innovadores vinculaos al desenvolvimientu rural
    • El conveniu cola Axencia Española de Cooperación que facilita una acción coordinada n'ayuda humanitaria prorrógase un añu

    El presidente del Gobiernu d'Asturies, Adrián Barbón, va abrir esta tarde'l diálogu cola Federación Asturiana d'Empresarios (Fade), Comisiones Obreres (CC. OO.) y la Unión Xeneral de Trabayadores (UXT) cola mira d'algamar un alcuerdu de concertación qu'impulse la crecedera económica, la creación d'empléu y el dinamismu empresarial, con atención especial a la innovación científica y tecnolóxica. A la xunta van asistir tamién el vicepresidente, Juan Cofiño, y el conseyeru d'Industria, Empléu y Promoción Económica, Enrique Fernández.

    El xefe del Executivu espunxo les metes del diálogu social mientres la xunta del Conseyu de Gobiernu, que la so primer parte tuvo dedicada a la reflexón política y al esplegue d'iniciatives. Barbón quier reforciar l'entendimientu cola patronal y los sindicatos, talmente que redunde en beneficiu del desenvolvimientu socioeconómicu de la comunidá, d’acuerdu coles exes d'actuación plantegaes nel so discursu d’investidura: la creación d'empléu de calidá, l'impulsu d'una industria competitiva que tenga a la ciencia como gran aliada, el refuerciu y afitamientu de los servicios públicos, el trabayu por una igualdá efectiva en tolos ámbitos y l'abordaxe del retu demográficu.

    “La concertación convirtióse nuna seña d'identidá de los gobiernos socialistes. Nós queremos reeditar el pactu social y, al empar, afaelu y empobinalu escontra los horizontes de l'Asturies del sieglu XXI, ente los cualos l'apueste pola modernización científica y tecnolóxica ye una prioridá indiscutible”, manifestó'l presidente.

    El financiamientu autonómicu foi otru de los asuntos trataos pol Executivu. La conseyera de Facienda, Ana Cárcaba, informó de que'l martes 15 va celebrase la primer xunta, a la que fueron convocaos tolos grupos con representación na Xunta Xeneral del Principáu. L'alcuentru va celebrase na sede de la Presidencia y tamién va cuntar cola asistencia del xefe del Gobiernu.

    El presidente sorrayó qu'agora, desque tolos conseyeros y conseyeres comparecieron nel Parllamentu pa esponer los sos programes respectivos, ye cuando l'Executivu tien d'empezar con estes iniciatives. Barbón xulgó de manera bien positiva'l desenvolvimientu de les comparecencies: “punxeron de manifiestu'l lideralgu y la iniciativa del Executivu énte los desafíos de la nuestra comunidá, l'ambición y les ganes cob que'l Gobiernu nuevu d'Asturies deseya encaralos y superalos”.



    Soluciones innovadores pa problemes del mediu rural

    El Conseyu de Gobiernu alcordó destinar 500.000 euros a la convocatoria d'ayudes pa la creación de grupos operativos de l'Asociación Europea d'Innovación d'Agricultura Productiva y Sostenible (AEI), nel marcu del Programa de Desenvolvimientu Rural d'Asturies 2014-2020. Los fondos van distribuyise d’esta miente: 150.000 p'anguaño y 350.000 pal próximu.

    Les ayudes, que les sos cuantíes muévense ente los 5.000 y los 35.000 euros, faciliten la puesta en marcha d'estos grupos, qu'han tar formaos por un mínimu de trés integrantes y que, nesta primer fase, reciben fondos pa detectar una necesidá nel mediu rural y diseñar un proyectu pa da-y respuesta. Trátase de buscar soluciones innovadores o con base tecnolóxica empobinaes a la meyora de les condiciones socioeconómiques del sector.

    La primer convocatoria realizóse nel 2018 y favoreció la creación de 17 grupos operativos que plantegaron estudios pa facilitar el control del ganáu en zones con grandes carnívoros, la meyora del rendimientu d'esplotaciones de lleche, la diversificación del usu de la castaña o l'amenorgamientu de la buelga de carbonu nel mediu rural, ente más otros.

    Otra manera, la llinia d'ayudes dirixida a la puesta en marcha de proyectos d'innovación llanzóse en xunetu, con una dotación de 4 millones, a los qu'opten un total de 24 iniciatives, 15 de les cuales surdieron de grupos operativos.

    L’AEI aspira a fomentar la innovación nel sector agrariu, cola mira d'aumentar la competitividá, producir más con menos recursos y amenorgar l'impactu ambiental.



    50.000 euros pa l'acción conxunta n'ayuda humanitaria

    L'Executivu del Principáu va aportar 50.000 euros a l'Axencia Española de Cooperación Internacional pal Desenvolvimientu (Aecid) pa l'actuación coordinada nel campu de l'ayuda humanitaria.

    Asturies soscribió'l 3 d'ochobre del 2018 un conveniu cola Aecid xunto con Galicia, Cantabria, Castiella y Llión, La Rioxa, Murcia, Comunidá Valenciana, Baleares, Madrid y la Federación Española de Conceyos y Provincies pa impulsar una acción conxunta nesti ámbitu. Los firmantes comprométense a aunir recursos financieros, humanos y técnicos cola mira d'optimizar la xestión y llograr un mayor impactu de l'ayuda humanitaria nel esterior. L'Executivu autorizó güei la soscripción d'una adenda a esi alcuerdu, qu'agora se prorroga hasta'l 9 d'ochobre del 2020, asina como l'aportación económica que-y correspuende.

    Les intervenciones que van financiase con esos fondos van responder a llamamientos humanitarios internacionales emitíos por Naciones Xuníes y van centrase na protección de la población, la seguridá alimentaria y la nutrición, les redes d'agua y saniamientu, la hixene y la salú.



    Sofitu a los Alcuentros Internacionales de Mocedá de Cabueñes

    El Conseyu de Gobiernu aprobó un conveniu de collaboración cola Fundación Municipal de Cultura, Educación y Universidá Popular de Xixón pa la celebración de los 37 Alcuentros Internacionales de Mocedá Cabueñes. Al traviés d'esti alcuerdu, el Principáu aporta 10.000 euros a la organización d'esti foru de referencia pa la población nueva que suma más de trés décades de trayectoria.



    Conveniu pa la celebración del Festival de Danza Gijón/Xixón

    L'Executivu va soscribir un conveniu cola Fundación Municipal de Cultura, Educación y Universidá Popular de Xixón cola mira de sofitar la celebración de la XIX edición del Festival de Danza Gijón/Xixón. El Principáu va aportar 7.000 euros pal desenvolvimientu d'esta cita cultural, una amuesa qu'incluye espectáculos en dellos espacios de la ciudá.

     

    Formatu orixinal (PDF : 198 Kb )

Información sobre el documento

© Copyright 2006. Gobierno del Principado de Asturias