Gobiernu del Principau d'Asturies

Asturies, muncho más cerca

Tas en

Asturias.es Gobiernu Alcuerdos del Conseyu de Gobiernu: 26/03/2020
 

Alcuerdos del Conseyu de Gobiernu: 26/03/2020

  1. 26 de marzo de 2020
    Alcuerdos del Conseyu de Gobiernu: 26/03/2020
    El Gobiernu d'Asturies aprueba un paquete de diez midíes p’aminorar los efectos económicu y social del COVID-19 que van movilizar polo menos 32 millones
    • L'Executivu negocia coles principales entidaes financieres l'adelantu de les prestaciones de desempléu a trabayadores afectaos por ERTE declaraos de fuerza mayor
    • El Principáu plantega una ayuda d'hasta 400 euros para autónomos qu'exerzan l'actividá a títulu propiu y nun puedan caltener abiertos los sos negocios mientres l'estáu d'alarma 
    • L'Alministración autonómica va conceder un aplazamientu tributariu de seis meses para empresarios per cuenta propia, pymes y micropymes
    • Una llinia de creitu de 10 millones avalada na so totalidá por Asturgar va permitir ameyorar la lliquidez empresarial

    El Conseyu de Gobiernu aprobó güei un paquete de diez midíes estraordinaries empobinaes a desaniciar los efectos económicos y sociales derivaos de la situación d'emerxencia pol COVID-19. Estes actuaciones van suponer la movilización de 32 millones a lo menos y van beneficiar principalmente a trabayadores y empreses afectaes por espedientes de regulación temporal d'empléu, a autónomos y microempreses, a industries y a los conceyos.

    Estes iniciatives complementen les adoptaes pol Gobiernu d'España, recoyíes nel Real Decreto-llei 8/2020, de 17 de marzu, de midíes urxentes estraordinaries, y dan continuidá a les aprobaes nos últimos díes pol Executivu autonómicu, ente les que figura l'adelantu del pagu del salariu social y de les prestaciones a les persones dependientes, mesmo que l'aplazamientu de les obligaciones tributaries de les tases ya impuestos xestionaos pol Principáu.

    En cuanto al conteníu concreto de les midíes, cabe destacar lo siguiente:

    • Negociación con entidaes financieres pal adelantu del pagu de les prestaciones de desempléu a trabayadores afectaos por ERTE declaraos por causes de fuerza mayor.
    • Facilidaes de creitu y lliquidez a los conceyos por importe de 16 millones: contempla una llinia d'hasta 8.000.000 al traviés de la Caxa de Creitu de Cooperación Local pa inversiones o gastos estraordinarios rellacionaos col COVID-19, y l'adelantu del pagu del Fondu de Cooperación Local, dotáu con otros 8 millones.
    • Ayudes pa los empresarios autónomos qu'exercen l'actividá a títulu propiu naquelles actividaes ensin autorizar pa la so apertura nel periodu del estáu d'alarma: l'ayuda máxima xube a 400 euros mensuales y diríxese al pagu de gastos fixos como arriendos, cuotes hipotecaries y de renting, suministros, etcétera. Esta midida podría beneficiar a más de 12.000 autónomos, según les primeres estimaciones.
    • Reaxuste, mientres l'estáu d'alarma, de la potencia eléctrica contratada: el Gobiernu alcordó coles principales compañíes y distribuidores la posibilidá de que cualesquier consumidor pueda amenorgar temporalmente la potencia contratada y recuperala darréu, ensin que s'incurra en costos o penalizaciones. Esta midida beneficia a autónomos, al pequeñu comerciu y a pymes y tamién a la gran industria.
    • Aplazamientos tributarios a trabayadores autónomos, pymes y microempreses: esta midida va concedese por un plazu de 6 meses, ensin intereses, pa les obligaciones tributaries col Principáu xeneraes ente'l fin del estáu d'alarma y el 1 de xunu de 2020.
    • Aumentu de la lliquidez a pymes, microempreses y autónomos al traviés d'una nueva llinia d'avales per parte d’Asturgar: la sociedá de garantía recíproca del Principáu va responder por frente a les entidaes financieres el 100% d'una llinia de creitu de 10 millones d'euros. Esta midida pretende complementar les llinies de creitu del Estáu.
    • Aplazamientu de los creitos avaláu por por Asturgar: Esta midida va tener un periodu de vixencia de seis meses y un añu adicional de falta nel que solo tendrán d'abonase los intereses de los préstamos. Les empreses tendrán d'acreditar un impactu significativu del Estáu d'Alarma na so actividá.
    • Aplazamientu de los préstamos concedíos pola Sociedá Rexonal de Promoción (SRP): van aplazase les cuotes trimestrales del primera y segundu trimestre de los préstamos y de los préstamos participativos a valir, que se van abonar prorrateaes a lo llargo del próximu exerciciu. Igualmente, les empreses tendrán d'acreditar un impactu significativu del Estáu d'Alarma na so actividá.
    • Medra de la bonificación na contratación d'asesores de comerciu esterior: va aplicase una bonificación del 80% nos servicios de los profesionales qu'empresten serviciu a empreses esportadores afectaes pol COVID-19.
    • Moratoria de trés meses (marzu, abril y mayu) nel pagu d'arriendos pa compañíes allugaes nos centros d'empreses dependientes del Principáu.

    El conseyeru d'Industria, Empléu y Promoción Económica, Enrique Fernández, destacó l'algame d'estes midíes estraordinaries como complementu a les puestes en marcha pol Gobiernu d'España. Sicasí, adelantró que l'Executivu autonómicu va siguir “analizando y valorando otres", en función de la evolución de los acontecimientos.

    Fernández sorrayó la necesidá d'actuar con rigor y seriedá, de cuenta que les iniciatives que s'apliquen seyan efectives y nun se conviertan en simples enunciaos de propósitos. Tamién recordó que, dende l'entamu de la crisis, el Gobiernu d'Asturies tuvo en contactu colos axentes sociales, les empreses y otros colectivos afectaos pola crisis del COVID-19, de la que foi analizando les distintes midíes aprobaes pol Executivu estatal. El titular d'Industria aportunó en que la gran prioridá ye, sobro cualesquier otra, la crisis sanitaria, de la que se trata d'amenorgar l'impactu económicu y social que van tener les necesaries midíes de confinamientu aplicaes a la población.



    Ver en formatu orixinal (PDF : 175 Kb )

Información sobre el documento

© Copyright 2006. Gobiernu del Principau d'Asturies