Gobierno del Principado de Asturias

Asturias, mucho más cerca

Estás en

Aniciu Gobiernu Acuerdos del Conseyu de Gobiernu Alcuerdos del Conseyu de Gobiernu: 11/04/2019
 

Alcuerdos del Conseyu de Gobiernu: 11/04/2019

  1. 11 de abril de 2019
    Alcuerdos del Conseyu de Gobiernu: 11/04/2019
    El Gobiernu d’Asturies aprueba’l decretu que refuerza’l control ambiental de les empreses con más potencial contaminante

       - La norma afecta a alredor de 500 instalaciones, qu’han facilitar les inspecciones y actuar cuando se produza cualquier situación anómala qu’implique riesgu
       - El Principáu llanza la mayor convocatoria realizada hasta agora pa sofitar les inversiones n’esplotaciones agraries y la creación d’empreses por mocedá nel mediu rural: 27,7 millones
       - Les condiciones d’accesu a los salones de xuegu equipárense agora coles establecíes pa casinos, bingos y sales d’apuestes
       - L’Executivu, ‘la Caixa’ y el Conceyu de Mieres impulsen un programa p’ayudar a 50 families en situación de probeza y vulnerabilidá

    El Gobiernu d’Asturies aprobó güei’l decretu de protección y control ambiental industrial, que refuerza y regula la rellación ente l’autoridá autonómica y les aproximao 500 instalaciones de mayor potencial contaminante del Principáu.

    La norma establez los principios y oxetivos de la inspección ambiental, amás de la planificación y les facultaes del Executivu. Tamién afita les obligaciones de les empreses, qu’han facilitar les acciones de comprobación, cuntar con un ‘representante ambiental’ y informar y actuar cuando se produza cualquier situación anómala que pueda suponer una amenaza o un dañu pal mediu ambiente o la salú de les persones. Amás, les compañíes van tener que vixilar les sos emisiones a l’atmósfera.

    El testu crea y regula la figura de los organismos de control ambiental como entidaes d’inspección o llaboratorios d’ensayu acreitaos nos campos d’atmósfera, agua, residuos, suelos contaminaos y ruíu. Estos órganos van exercer les sos funciones a instancia de les instalaciones industriales o a requerimientu del Principáu.

    La llexislación europea avanza camín de la sustitución del control a priori de les alministraciones pola vixilancia a posteriori, con cuenta de nun se ralentice l’iniciu de les actividaes económiques. De toles maneres, esto nun supón una perda de capacidá de les autoridaes, sinón un cambéu nel momentu en que se lleva a cabu’l control. Les lleis estatales recueyen, amás, la posibilidá de que les comunidaes se sofiten n’entidaes esternes acreitaes pa la execución de llabores d’inspección y control.

       - Instrucciones técniques
       - El decretu faculta al titular de la conseyería con competencies en materia de mediu ambiente pa dictar instrucciones técniques que concreten procedimientos de control d’emisiones, amás de modelos pa los documentos de vixilancia que tienen qu’ellaborar les empreses d’alcuerdu colo riquío na so autorización ambiental.
       - Nesti sentíu, el Principáu remata yá la redacción de trés instrucciones que van desenvolver el decretu aprobáu güei n’otros tantos ámbitos: la xestión de les estaciones d’inmisión atmosférica, el control de les emisiones per chimenea y el de les denominaes emisiones difuses.
       - Inspección ambiental

    La directiva europea del 2010 d’emisiones industriales obliga a les alministraciones a cuntar con un sistema d’inspección ambiental y a ellaborar planes plurianuales -que s’executen al traviés de programes anuales- y que s’apliquen a les industries incluyíes nel réxime européu integráu de prevención y control de la contaminación. Nel Principáu hai alredor de 80 instalaciones d’estes característiques, qu’operen con un permisu ambiental únicu: l’autorización ambiental integrada.

    Dende’l 2014 aprobáronse programes anuales d’inspección, que nel so marcu realícense controles por personal funcionario. La frecuencia de les visites varia: pue ser añal, bianual o trienal, a tenor del análisis de riesgos que se lleva a cabu.

    El Plan d’Inspección Ambiental pal periodu 2018-2020 amplía l’algame de les actividaes que se someten a control. Asina, amás de les empreses con autorización ambiental integrada, realízase tamién un siguimientu d’otru tipu d’actividaes con incidencia sobre’l mediu.



    Modernización d’esplotaciones y incorporación de mocedá

    El Conseyu de Gobiernu autorizó un gastu plurianual de 27,7 millones pa sofitar les inversiones n’esplotaciones agraries y la creación d’empreses por llabradores mozos. Esta convocatoria ye la de más cantidá realizada hasta agora.

    La distribución del gastu va llevase a cabu en cuatro años: 5,2 millones anguaño, 5 nel 2020, 7 nel 2021 y 10,5 nel 2022.

    Estes subvenciones, recoyíes nel Programa de Desenvolvimientu Rural 2014-2020, busquen ameyorar el rindimientu de les esplotaciones con un usu más afayadizu de los instrumentos de producción. Tamién quieren impulsar la innovación y la incorporación de tecnoloxíes nueves, amás de favorecer l’accesu de la mocedá al empléu nel mediu rural, cola mira de facilitar el relevu xeneracional pa garantizar la supervivencia del sector y ayudar al equilibriu territorial.

    Asina, nesta convocatoria, el Principáu dobla l’importe de les ayudes individuales pa la incorporación de mocedá al campu, que pasen de 25.000 a 50.000 euros. Tamién dobla la cuantía de les subvenciones a los proyectos de modernización d’esplotaciones ganaderes. En concreto, el toope d’inversión susceptible de recibir ayudes xube de 100.000 a 200.000 euros por trabayador y de 200.000 a 400.000 por esplotación, lo que supón una medría del 100 %. Estos topes dóblense tamién cuando se trata de cooperatives, que van poder recibir hasta 800.000 euros.

    Les ayudes a esplotaciones consisten en subvenciones directes de capital que cubren el 40 % de la inversión prevista nel plan de meyora. Esti porcentaxe pue xubir nel casu d’instalaciones y equipos de tratamientu de purín y de les iniciatives qu’impulsen profesionales mozos nos cinco primeros años depués d’establecese.

    Los gastos y inversiones subvencionables tán dirixíos a la construcción o meyora d’inmuebles, la compra de maquinaria y equipos, l’adquisición o desenvolvimientu de programes informáticos y patentes, llicencies, derechos d’autor o marques rexistraes.



    Modificación del reglamentu de máquines recreatives

    L’Executivu aprobó la modificación del artículu 49 del Reglamentu de Máquines Recreatives y d’Azar cola mira d’equiparar les condiciones d’accesu a los salones de xuegu coles establecíes anguaño pa casinos, bingos y sales d’apuestes. El cambéu tamién va dexar determinar una zona d’influencia onde nun se podrán abrir locales nuevos.

    D’equí p’arriba, va esixise’l documentu nacional d’identidá (DNI) a cualquier persona que quiera entrar a estos salones. D’esta forma, va evitase qu’accedan los menores, daqué que siempre se controló, y tamién aquelles persones que, por cualquier razón, tienen prohibíu l’accesu a locales d’estes característiques. D’esta manera, el Principáu va ser la primer comunidá en disponer de los mesmos mecanismos de vixilancia en tolos establecimientos de xuegu, al xeneralizar el sistema d’identificación previa.

    Amás, prohíbese instalar salones de xuegu a menos de cien metros de distancia de centros educativos nos que s’impartan enseñances a menores d’edá, una zona d’influencia que yá rixe na normativa específica sobre sales d’apuestes y casinos.

    La Conseyería de Presidencia y Participación Ciudadana impulsa asina midíes nueves pa promover el xuegu responsable y prevenir conductes adictives, de la que favorez una medría ordenada del sector.



    374.294 euros pa la meyora de la calidá de la lleche

    El Gobiernu aprobó una partida de 374.294 euros pa la convocatoria de subvenciones destinaes a servicios d’asesoramientu y participación en rexímenes de certificación d’esplotaciones ganaderes de lleche. Esta llinia tien por finalidá ameyorar la calidá de la lleche producío n’Asturies y la competitividá de les empreses.

    Les actividaes subvencionables incluyen el funcionamientu de los equipos de catadura y los tanques de refrixeración, la vixilancia y detección de xérmenes patóxenos, la eficiencia enerxética y la certificación esterna de les esplotaciones. Los destinatarios de les ayudes son los primeros compradores que recueyan la lleche de les esplotaciones, anque los beneficiarios finales van ser los ganaderos.



    Conveniu con ‘la Caixa’ pa sofitar la infancia

    El Conseyu de Gobiernu autorizó la firma d’un conveniu de collaboración cola Fundación Bancaria ‘la Caixa’ y el Conceyu de Mieres pal desenvolvimientu del programa Caixaproinfancia. Esti proyectu, que yá se lleva a cabu n’otres comunidaes, busca’l desenvolvimientu integral de menores y families en situación de probeza y vulnerabilidá social. En concreto, ta previsto sofitar 50 families que va escoyeles un grupu de trabayu a tenor del so nivel d’ingresos.

    El programa incluye delles llinies d’actuación:

       - Midíes de refuerzu educativu, sofitu en logopedia y psicomotricidá y ayudes pa la compra de material escolar.
       - Actividaes estraescolares nel periodu llectivu y campamentos d’iviernu y branu.
       - Espacios familiares con menores d’hasta 3 años pa sofitar la crianza, talleres educativos, etcétera.
       - Atención psicosocial personalizada, talleres d’acompañamientu, talleres terapéuticos grupales…
       - Sofitu p’alimentación y hixene infantil, ayudes pa la compra de gafes y el caltenimientu d’audífonos.

    La fundación ‘la Caixa’ va invertir 225.000 euros na iniciativa y va encargase de coordinala, primero pa un periodu de trés años. Pa eso, va escoyer entidaes sociales de la zona que van executar los programes. Pela so parte, el Principáu y el Conceyu de Mieres van facilitar sofitu institucional y van collaborar nel bon desenvolvimientu del proyectu.



    Alcuerdu col Conceyu de Llangréu

    El Conseyu de Gobiernu autorizó un conveniu de collaboración ente la Conseyería d’Educación y Cultura y el Conceyu de Llangréu pal usu y caltenimientu de los espacios deportivos del IES Jerónimo González, de Sama. L’alcuerdu, que va tener una vixencia de cuatro años, da prioridá al alumnáu del institutu pa utilizar les instalaciones, nes que pue practicase fútbol, fútbol-sala, baloncestu, balonmano y voleibol. El conveniu afecta tamién al polideportivu d’altu rindimientu de Los Llerones, la zona de duches esterior y el campu de fútbol.



    Festival Intercélticu de Lorient

    El Gobiernu d’Asturies autorizó la soscripción d’un conveniu de collaboración cola asociación Festival Intercélticu de Lorient pa la promoción artística y cultural del Principáu cola participación nel certame d’anguaño.

    El Festival Intercélticu de Lorient va desenvolvese del 2 al 11 d’agostu y la delegación asturiana va tar formada pola Banda Gaites Fonte Fuécara (Llanera), Grupu Folclóricu Prau Llerón (Mieres), el gaiteru Rubén Alba, el dúu L-R y los concursantes del troféu McCrimmon, que se van conocer en xunu.

    El Principáu va financiar los costos de desplazamientu del grupu asturianu y l’adquisición del troféu del Memorial Remis Ovalle, concursu pa gaiteru solista que lleva apareyada la selección de los cuatro miembros de la delegación que participen nel troféu McCrimmon.

     

    Formatu orixinal (PDF : 264 Kb )

Información sobre el documento

© Copyright 2006. Gobierno del Principado de Asturias