Gobierno del Principado de Asturias

Asturias, mucho más cerca

Estás en

Aniciu Gobiernu Acuerdos del Conseyu de Gobiernu Alcuerdos del Conseyu de Gobiernu: 26/03/2019
 

Alcuerdos del Conseyu de Gobiernu: 26/03/2019

  1. 26 de marzo de 2019
    Alcuerdos del Conseyu de Gobiernu: 26/03/2019
    El Gobiernu d'Asturies destina 5,1 millones a la contratación de 49 técnicos para reforzar les oficines públiques d'emplé

       - La midida, que quier garantizar una atención personalizada a los usuarios del serviciu, va estendese dende'l próximu 1 d'abril hasta'l 31 d'avientu de 2021
       - Les obres de saneamientu d'Ortigueira, en Cuaña, y de Fozana y H.ueyo, na parroquia sierense de Tiñana, van costar 1.386.762 euros
       - El Principáu va suspender ocho meses les autorizaciones d'apertura d'establecimientos de xuegu para definir los nuevos criterios que van rexir la concesión de llicencies
       - Aprobáu un gastu de 700.000 euros para subvenciones empobinaes a empreses de base tecnolóxica
       - L'Executivu va ampliar con 32 titulaos universitarios l'equipu qu'asesora a los contribuyentes na campaña de la renta

    El Gobiernu d'Asturies aprobó güei el tercer plan de refuerzu del Serviciu Públicu d'Empléu del Principáu (Sepepa), qu'inclúi la contratación de 49 técnicos p’ameyorar l'atención a los demandantes d'un puestu de trabayu. Esta midida va estendese dende'l próximu 1 d'abril hasta'l 31 d'avientu de 2021, y va cuntar con un presupuestu tresañal de 5.197.163 euros.

    Losl xestores van desempeñar el so llabor nes oficines públiques d'empléu y van centrase n'ufiertar asistencia personalizada a los usuarios, dirixéndolos sobre los servicios y recursos disponibles pa la busca d'empléu ya impulsar actividaes d'intermediación llaboral. Tamién van realizar acciones de siguimientu y evaluación de los programes desenvueltos y van intensificar la relación coles empreses pa conciliar meyor ufiertes y demandes de trabayu.

    L'actual situación del mercáu llaboral, según la necesidá de garantizar la prestación de los servicios recoyíos na cartera común del Sistema Nacional d'Empléu en condiciones d’equidá, aconseya poner en marcha un nuevu plan de refuerzu.

    El Sepepa caltién como ún de los sos principios básicos l'atención personalizada a los demandantes d'empléu y otorga prioridá a los colectivos con mayores dificultaes: mozos, mayores de 45 años, paraos qu'escosaron les prestaciones y miembros d'una unidá familiar na que se percibe'l salariu social básicu.

    El Conseyu de Gobiernu autorizó en febreru de 2013 el primer plan de refuerzu, qu'incluyó'l nomamientu de 49 técnicos hasta'l 31 d'avientu de 2015. El segundu, que buscaba’l caltenimientu de l'atención personalizada a los demandantes d'empléu, foi dende'l 1 de marzu de 2016 hasta'l 31 d'avientu 2018.



    Proyectos de saneamientu en Cuaña y Siero

    El Gobiernu autorizó'l gastu y la contratación de dos obres de saneamientu en Cuaña y Siero que sumen 1.386.762 euros y van cuntar cola financiación del Fondu Européu de Desenvolvimientu Rexonal (Feder).

    Per una parte, va llevase a cabu'l proyectu de saneamientu d'Ortigueira (Coaña) con un presupuestu de 911.595 euros distribuyíu en trés añalidaes: 300.000 anguaño, 500.000 el próximu y 111.595 en 2021. L'actuación va consistir na renovación de les conducciones d'esti núcleu de población, que cunta con cercal de 400 habitantes. Asina, nun plazu averáu de 22 meses van executase catorce colectores que van terminar nun bombéu asitiáu nel puertu d'Ortigueira. Dende esa instalación, les agües residuales van impulsase escontra la depuradora de Navia-Cuaña pal so afayadizu tratamientu antes del so arramáu final.

    Per otru llau, van realizase trabayos en Fozana y H.ueyo, na parroquia sierense de Tiñana, con una inversión de 475.167 euros. Los arramaos esvalixaos qu'agora se producen nestes localidaes van recoyese pa, darréu, conducilos por gravedá hasta'l colector interceptor del ríu Nora, previu pasu per un alliviaderu. Estos llabores, de les que se van beneficiar 384 vecinos, inclúin 39 acometíes domiciliaries y van tener un plazu d'execución de cuatro meses dende la so axudicación.

    La contratación va llevase a cabu, en dambos casos, por procedimientu abiertu, tramitación ordinaria y dellos criterios d'axudicación.



    Regulación de los establecimientos de xuegu

    El Gobiernu d'Asturies decidió suspender, per un períodu d'ocho meses, les autorizaciones pa l'apertura de nuevos establecimientos de xuegu nel Principáu, hasta que se definan los nuevos criterios polos que se van rexir la concesión de les llicencies.

    L'Executivu analizó nos últimos meses distintes midíes pa garantizar un crecimientu ordenáu del sector, col fin de dar continuidá a otres acciones de supervisión y control que dexaron cuntar anguaño con una ufierta ordenada na comunidá. Anque la dimensión actual del sector se caltién d’esti añu recibiéronse nel Serviciu de Xuegu de la Dirección Xeneral d'Interior 47 consultes de viabilidá, frente a una media añal de cinco espedientes. Esti fechu demuestra un creciente interés per parte de les empreses operadores pa instalase nel Principáu.

    Por esta razón, l'Alministración autonómica va empecipiar agora la ellaboración de los criterios d'ordenación que van rexir la concesión de nueves autorizaciones y que van ser analizaos pol Conseyu de Xuegu. Asina, nel senu d'esti órganu d'asesoramientu y consulta valoraráse la posibilidá d'establecer llimitaciones territoriales o numbériques al númberu d'establecimientos de xuegu nel Principáu y van sopesase les distintes opciones, n'evaluando les repercusiones económiques, sociales y d'empléu.

    La moratoria nun va afectar a los espedientes nos que quede acreditáu que la solicitú de llicencia d'obra o actividá ye anterior al alcuerdu adoptáu güei pol Conseyu de Gobiernu.

    Con esta decisión, el Principáu va ser la tercer comunidá autónoma, dempués de Cataluña y Murcia, n'establecer llimitaciones a la ufierta d'establecimientos de xuegu y apuestes, conxugando'l respetu a l'actividá empresarial col desenvolvimientu de polítiques de xuegu responsable que combinen acciones preventives, de sensibilización, d'intervención y de control.



    Sofitu a les empreses tecnolóxiques

    El Conseyu de Gobiernu aprobó un gastu de 700.000 euros pa financiar la convocatoria de subvenciones empobinaes a empreses de base tecnolóxica, una llinia que xestiona l'Institutu de Desarrollu Económicu (Idepa).

    La convocatoria pretende fomentar la execución de proyectos d'investigación, desenvolvimientu ya innovación (I+D+i) nel marcu de la Estratexa Rexonal d'Especialización Intelixente Asturies RIS3. Pa ello, financia tanto la creación y puesta en marcha d'empreses de base tecnolóxica como'l so afitamientu y desenvolvimientu comercial.

    Los costos subvencionables van ser los relativos a activos fixos, personal técnicu, materiales, alquisición de patentes, protección de la propiedá industrial, auditoríes y gastos pa la constitución y desenvolvimientu de les firmes. La cuantía de l'ayuda ye variable y depende del tamañu de la compañía y de la categoría del proyectu. A lo más, puede algamar hasta'l 75% del gastu subvencionable.

    En 2018, el Gobiernu d'Asturies sofitó la execución d'ocho proyectos d'empreses de base tecnolóxica con 447.532 euros n'ayudes, que xeneraron inversiones por un valor superior a los 700.000 euros.

    Les subvenciones financiar con partíes del Principáu y del Fondu Européu de Desenvolvimientu Rexonal (Feder).



    1,6 millones p'atención residencial psicoxeriátrica

    L'Executivu autorizó un gastu de 1.615.926 euros pa prorrogar, por un plazu de 24 meses, la xestión de 45 places residenciales alcordaes de calter psicoxeriátricu.

    L'organismu autónomu Establecimientos Residenciales p’Ancianos d'Asturies (ERA) cuenta na actualidá con 190 places d'estes característiques, destinaes a persones con enfermedá psíquica severa.



    Asesoría a los contribuyentes pal IRPF

    El Gobiernu d'Asturies impulsa un añu más el conveniu col Colexu d'Economistes del Principáu que dexa contratar a 32 titulaos universitarios con conocencies n'asesoría fiscal pa reforzar l'equipu de técnicos que van atender a los contribuyentes na campaña de la renta.

    L'Executivu va apurrir 96.000 euros pa financiar el conveniu. Pela so parte, la institución colexal va encargar d'escoyer a los técnicos ente titulaos desemplegaos que cursaren el Máster n'Asesoría Fiscal y Práctica Profesional o'l Cursu d'Espertu nel Impuestu sobre la Renta de les Persones Físiques (IRPF) ya Impuestu sobre'l Patrimoniu qu'entama la mesma entidá.

    Les persones escoyíes van distribuyise ente les oficines nes que se va emprestar sofitu a los contribuyentes: les plataformes conxuntes del Principáu y l'Axencia Tributaria n'Uviéu, Xixón y Avilés, y los seis puntos que se van habilitar con personal de l'Alministración autonómica en Llaviana, Llanes, Navia, Siero, Tinéu y A Veiga.

    La campaña presencial pa la presentación de la declaración de la renta va empezar el 14 de mayu y va rematar el 1 de xunetu. Los pidimientos p'acutar cita previa podrán solicitase, a partir del 9 de mayu y hasta el 28 de xunu, al traviés del teléfonu 901 22 33 44 o na web de l'Axencia Tributaria (@www.agenciatributaria.es).



    Convenios del Ente de Servicios Tributarios

    El Conseyu de Gobiernu autorizó la firma de dos talos convenios del Ente de Servicios Tributarios del Principáu col Conceyu de Siero y coles parroquies rurales.

    En virtú del primer alcuerdu, l'organismu autonómicu va asumir la xestión y recaldación del impuestu municipal sobre la medra del valor de los terrenos de naturaleza urbana, conocíu popularmente como ‘plusvalía’. El conveniu con Siero va tar vixente cuatro años y podrá anovase añalmente por cuatro más.

    Per otru llau, el conveniu coles parroquies rurales suscríbese pa que l’ Ente Tributariu s’encargue de la xestión y recaldación de los tributos y otros ingresos de derechu públicu que son competencia d'estes entidaes. Trátaser d'un convenio marcu al que podrán xuntase les parroquies rurales que o quieran

     

    Formatu orixinal (PDF : 129 Kb )

Información sobre el documento

© Copyright 2006. Gobierno del Principado de Asturias