Gobierno del Principado de Asturias

Asturias, mucho más cerca

Estás en

Aniciu Gobiernu Acuerdos del Conseyu de Gobiernu Alcuerdos del Conseyu de Gobiernu: 03/04/2019
 

Alcuerdos del Conseyu de Gobiernu: 03/04/2019

  1. 3 de abril de 2019
    Alcuerdos del Conseyu de Gobiernu: 03/04/2019
    El Gobiernu d’Asturies eleva hasta 19,7 millones la convocatoria del programa Leader pa esti añu, la mayor realizada hasta agora

       - El Principáu autoriza una partida adicional de 4,2 millones para esta llinia d'ayudes, que sofita les iniciatives de diversificación económica nel mediu rural
       - L'Executivu va adelantrar a los conceyos 1,5 millones pa redactar los proyectos municipales que se van financiar colos fondos mineros del períodu 2013-2018
       - Trés millones pa compensar a los conceyos que tienen de devolver anguaño les subvenciones de los planes d'empléu de 2014
       - Aprobáu'l decretu que regula los requisitos comunes d'accesu y los criterios de movilidá nos cuerpos de policías locales
       - Les obres de saneamientu de dellos núcleos de población de Llanera van tener un costu de 1,5 millones

    El Gobiernu d'Asturies autorizó güei un gastu adicional de 4.254.885 euros para les ayudes del programa Leader, que sofita la puesta en marcha de proyectos de diversificación económica nel mediu rural. Con esta ampliación, el presupuestu global destinasítiase en 19.754.885 euros, cantidá que la convierte na de mayor dotación hasta agora.

    Les cuantíes que se van asignar a los grupos queden de la siguiente manera

    Grupos d‘acción local Convocatoria Ampliación Total euros
    Camín Real de La Mesa 1.566.784 466.840 2.033.624
    Alto Nalón 1.074.087 83.450 1.157.537
    Narcea-Muniel.los 1.301.006 119.380 1.420.386
    Baxo Nalón 1.167.899 89.520 1.257.419
    Centru Asturies Periurbanu 676.764 253.180 929.944
    Comarca de la Sidra 1.219.406 247.100 1.466.506
    Montaña Central 1.598.367 335.791 1.934.158
    Navia-Porcía 1.929.019 611.670 2.540.689
    Oriente Asturies 1.985.504 648.988 2.634.492
    Ozcos-Eo 911.660 323.193 1.234.853
    Ese Entecabos 2.069.504 1.075.773 3.145.277
    15.500.000 4.254.885 19.754.885

     

    Los grupos de desenvolvimientu rural, que tomen el 90% del territoriu asturianu, xestionen mesmo inversiones granibles como non granibles, destinaes a empreses, entidaes locales ya instituciones ensin fines d'arriquecimientu.

    Daqué más de 3,7 millones de la partida autorizada güei empobínense a financiar proyectos pa la meyora y creación d'empreses y el tique rural, ente que'l restu destínase a iniciatives d'entidaes locales y ensin ánimu d'arriquecimientu.

    En solo trés años, el programa Leader impulsó más de 1.106 iniciatives que llograron fondos por un importe de 44,7 millones y xeneraron una inversión a entamadores, con unos porcentaxes de subvención que van dende 'l 40% y el 100% del costu del proyectu. Polo xeneral, destaquen les aplicaes a la diversificación económica, el tique rural y les micropymes alimentaries.

    El Fondu Européu Agrícola de Desenvolvimientu Rural (Feader) apurre un 80% del gastu, ente que el 14% cuerre al cargu de la Conseyería de Desenvolvimientu Rural y Recursos Naturales y el Ministeriu d'Agricultura, Pesca y Alimentación asume otru 6%.

    El Principáu aumentó en casi 32 millones les ayudes pa executar les estratexes de desarrollu local participativu del programa Leader nel periodu 2014-2020. Asina, esta midida de sofitu a la diversificación del mediu rural va tener una financiación total de 102 millones nesi plazu.

    Esta xubida ye frutu del cambéu del Programa de Desenvolvimientu Rural (PDR), que cunta con 325 millones de financiación. Primeramente, el PDR dedicaba al Leader un 14% de los fondos: 70 millones. Sicasí, tres la reprogramación, crez un 20%, lo que convierte a Asturies na primer comunidá d'España y la segunda d'Europa que más recursos asigna porcentualmente al desenvolvimientu local participativu.



    Impulsu a les comarques mineres

    El Conseyu de Gobiernu autorizó un gastu de 1.594.600 euros en subvenciones destinaes a los conceyos pa que redacten los proyectos de les 30 actuaciones que se van financiar colos fondos mineros del períodu 2013-2018.

    Esta partida va permitir a los conceyos encarar la ellaboración de los proyectos ensin tener que realizar desembolsu económicu dalgunu.

    El Ministeriu d'Enerxía, Turismu y Axenda Dixital y el Gobiernu del Principáu suscribieron el 20 de payares de 2017 el conveniu marcu de cooperación pal impulsu económicu de les contornes del carbón. Esi documentu, qu'incluyía como amiesto un llistáu global de 127 posibles actuaciones, plantega'l desarrollu d'infraestructures y midíes de restauración de zones degradaes por causa de la actividá minera.

    Darréu, el 19 d'avientu de 2018, l'Executivu autonómicu y l'Institutu pa la Reestructuración de la Minería del Carbón y Desenvolvimientu Alternativu de les Contornes Mineres preseleccionaron 54 iniciatives que van recibir financiación por valor de 97.909.000 euros. L'institutu va apurrir el 75% y el Principáu, el 25% restante. Del total d'actuaciones, 24 tán promovíes pol Gobiernu d'Asturies y 30 polos conceyos.

    Una vegada escoyíes les iniciatives, ye mester presentar al Institutu pa la Reestructuración de la Minería, dientro del plazu marcáu, el proyectu d'execución y la documentación necesaria pa empecipiar la tramitación de cada unu de los 54 convenios específicos de collaboración que van permitir impulsar les obres.

    Col fin de facilitar a los conceyos la ellaboración d'esos documentos, el Principáu decidió adelantar fondos por un valor de 1,5 millones. Esa cantidá supón el 4% del costu total de les actuaciones plantegaes polos conceyos -valoraes globalmente en 39.865.000 euros-, y va descontase de la financiación correspondiente al Principáu nel momentu de la firma de los convenios específicos de collaboración.



    Fondu estraordinariu pa los conceyos

    El Conseyu de Gobiernu aprobó'l decretu qu'afita les bases pa la asignación de les aportaciones del fondu estraordinariu de financiación municipal previstu na disposición adicional novena de la Llei de Presupuestos Xenerales del Principáu pa 2019. Esti fondu, dotáu con trés millones, creóse como mecanismu escepcional pa sofitar a los conceyos que tienen de devolver anguaño les subvenciones percibíes nel marcu de los planes d'empléu de 2014.

    El Serviciu d'Empléu del Principáu (Sepepa) va ser l'encargáu d'emitir una certificación na que se va detallar qué conceyos pueden ser beneficiarios de los fondos, según l'importe que tien de devolver cada unu. L'aportación estraordinaria que va recibir cada conceyu por aciu tresferencia nun va poder superar el 93% de la cantidá total que tenga que reintegrar.



    Adhesión al fondu de facilidá financiera pal segundu trimestre

    El Gobiernu del Principáu aprobó l'adhesión de la comunidá autónoma al Fondu de Facilidá Financiera pal segundu trimestre d'esti añu. L'Executivu yá aprobó a principios de marzu l'adhesión a esti mecanismu pal primer trimestre, polo que l'importe máximu del que se va disponer pa dambos periodos va ser de 221,54 millones.

    Esti fondu ye un mecanismu de financiación caracterizáu pola ausencia de condicionalidá fiscal y un tipu d'interés fixu asemeyáu al de la delda del Estáu, y adecuase al perfil de vencimientos del Principáu, cuestiones que faciliten l'adhesión d'Asturies.



    Normativa en materia de función pública

    L'Executivu aprobó güei dos decretos en materia de función pública: un pol que se creen y regulen los sectores y subsectores a los que s'asignen los puestos de trabayu del personal funcionariu y otru de cambéu de la norma que regula la configuración de la relación de puestos de trabayu.

    El primer decretu va ameyorar la movilidá y la formación, y va facilitar la provisión de puestos de trabayu pa llograr asina una mayor eficacia y eficiencia na xestión de los servicios públicos. Nesi sentíu, la clasificación por sectores y subsectores va permitir una valoración más áxil de la esperiencia de los funcionarios, un aspeutu fundamental a la d'executar el concursu de méritos que l'Alministración prevé convocar nes próximes selmanes.

    El segundu decretu tien como finalidá la de regular el derechu de los funcionarios d'otres alministraciones a participar nel concursu de méritos del Principáu.



    Decretu sobro policías locales

    El Gobiernu aprobó'l decretu que regula los requisitos comunes d'accesu y los criterios de movilidá nos cuerpos de policías locales del Principáu. Esta norma, consensuada nel senu de la Comisión de Policías Locales, supón un finxu nel desarrollu de la Llei 2/2007, de 23 de marzu, de Coordinación de los Policías Locales.

    L'aprobación del decretu va suponer un importante aforru pa los conceyos, cuidao que d'equí p'arriba, cuando los conceyos asina lo decidan, va ser l'Alministración autonómica la encargada de convocar y supervisar los procesos selectivos, que van constar de dos fases: la primera, d'oposición, qu'inclúi un test de conocencies, pruebes físiques y d'aptitú psicosocial y una reconocencia médica; y la segunda, de calter formativu.

    La nueva norma permite homoxeneizar y dotar d'oxetividá a los procedimientos d'accesu a los cuerpos. Amás, apurre claridá, al establecer un temariu únicu y requerimientos comunes, y garantiza les mesmes condiciones a tolos aspirantes. En relación cola movilidá xeográfica, determina un baremu qu'asegura un procesu unificáu en tola comunidá, polo que cualesquier axente va poder allegar a concursos de tresllaos como'l restu d'emplegaos de les alministraciones públiques, daqué qu'hasta agora nun yera posible.



    Meyora del saneamientu de Llanera

    L'Executivu autorizó un gastu de 1.597.447 euros pa contratar, por aciu procedimientu abiertu, dellos criterios d'axudicación, y tramitación ordinaria, les obres de saneamientu de los núcleos rurales de Veyo, La Vega, La Cigoña, Carbayeda, Remoria y Tabladiello, nel conceyu de Llanera, y la so conexón al colector interceptor de Villabona, qu'unvia les agües residuales a la depuradora de la mesma localidá.

    Esta actuación, que va beneficiar a una población envalorada de 493 persones, tendrá de rematar en 22 meses dende la so axudicación.



    Aprobada la plantiya básica de los centros docentes

    L'Executivu aprobó la plantiya básica de los centros docentes non universitarios pal añu académicu 2019-2020, que suma 9.238 places, 56 más qu'esti cursu.

    La Conseyería d'Educación y Cultura realizó un trabayu previu de planificación coles direcciones de los centros pa determinar les necesidaes reales de personal. Amás, tomó en consideranza les estimaciones actuales sobre la matrícula pal próximu cursu y los alcuerdos alcanzaos coles organizaciones sindicales.

    Sicasí, al marxe de la plantiya básica, tolos centros públicos van cuntar colos docentes necesarios p'atender les demandes del sistema educativu, cuidao que’a les places aprobaes agora va sumase’l personal funcionariude carrera ya interín que resulte oportunu, una vegada conocíos los datos reales de matrícula.



    Conveniu de collaboración ente'l Serida y la Ficyt

    El Conseyu de Gobiernu autorizó la firma d'un conveniu marco de collaboración ente la Fundación pal Fomentu n'Asturies de la Investigación Científica Aplicada y la Tecnoloxía (Ficyt) y el Serviciu Rexonal d'Investigación y Desenvolvimientu Agroalimentario del Principáu (Serida), con cuenta de que dambes entidaes puedan participar conxuntamente en proyectos d'I+D+I internacionales, especialmente nel contestu del Programa Marcu d'Investigación ya Innovación de la Unión Europea Horizonte 2020.

    El conveniu nun inclúi compromisos económicos. Nel casu de que dalguna de les propuestes presentaes a les convocatories resultara aprobada, sería necesariu un alcuerdu específicu que recueya les obligaciones económiques de les partes y la regulación de les actividaes.

     

    Formatu orixinal (PDF : 191 Kb )

Información sobre el documento

© Copyright 2006. Gobierno del Principado de Asturias